Nistelrooy hma hun a chiang lo

Manchester United manager lailawk Ruud van Nistelrooy chuan a hma hun a sawi chiang thei lo a, match hnih chhung a naute a kaihhruai hnuah Old Trafford-ah a cham chhunzawm ang em, tih chu zawhna lian tak a ni.

Erik ten Hag an ban hnuah Man United hian an assistant manager Nistelrooy hi an team enkawl lailawktu a nih thu an puang a, mahse manager lailawk an puan rual hian manager nghet atan Ruben Amorim an bia tih a lang nghal bawk.

Sporting Lisbon enkawltu Amorim hian November 11, Thawhṭanni aṭangin Man United manager nghet hna a chelh dawn, amah pui turin Nistelrooy hi a duh zel ang em, hriat a ni lo a, ani pawhin a awm zel dawn em, tih a sawi thei lo.

Dutch mi Nistelrooy chuan, "Tunah chuan ka sawi chiang thei lo, inbiakna awm hun ka nghak. Ruben Amorim a lo kal tur hi ka lawm a, thinlung takin ka lo lawm. A hnu lam erawh hunin a hril ang," a ti.

Player a nih laia United striker ṭha ni ṭhin Nistelrooy kaihhruaina hnuaiah Man United hian Leicester City an hneh a, a hnuah Chelsea nen an inhnehtawk - nizan khan Europa League khelin an result kan hre hman lo, a naute a kaihhruaina hnuhnung a ni nghal ang.