Mbappe a insiamrem a ngai - Benzema

Karim Benzema chuan Real Madrid dinhmun a thlir a, an player thar Kylian Mbappe tan a khelhna hmun siamrem mai a ngai dawn niin a sawi a, an ṭhat tlanna tur ber a nih a rin thu a sawi bawk.

France captain hian nipui bazar lai khan Paris Saint Germain aṭangin Real Madrid hi a zawm, a khelh thiamna chu mual vei lam sirah a ni. Mahse, a tana hmun ṭha lai berah hian Vinicius Junior a lo awm si, a duh ang boruak a dawng thei rih lo.

Benzema chuan, "Mbappe hi tlarhma laia khelh ṭhin a ni lo, a club hmasa leh ram tan pawh number 9 a ni ngai lo. Chutiang hmuna khelhtir a nih chuan a theihna sang tak angin a khel chhuak ngai lo tih pawh hmuh theih a ni.

"A khelh thiamna lam en ila, chutah chuan Vinicius a lo awm bawk si. Vinicius hi number 9 emaw mual sir lehlamah emaw khelh tir chi a ni si lo, a chhan chu left wing a nih hian a ṭhain danglamna a siam ṭhin.

"Mbappe hi number 9 ni lo mah se a khelh dan a siamrem hret a ngai niin a lang. Mite chuan goal khung tur leh ṭha taka khel reng turin an beisei bawk si, tunah chuan PSG lama boruak rit a neih ngai loh ang kha a nei mek," a ti.

Benzema hi Real Madrid tana goal khung tam pahnihna a ni a, a chungah Cristiano Ronaldo chiah a awm - Spanish club lian hi a chenchilh rei avangin a hrechiang ve tawk a, an ṭhat dan tur pawh a thlir thim tura ngaih a ni.