Bayern Munich an chak ve ta

Champions League match hnih a zawna an chak zawh loh hnuah Bayern Munich an chak ve leh ta a, Nilaini zan khan an mikhual Benfica chu 1-0 in an hneh - Jamal Musiala chuan inkhela goal awmchhun a khung.

Bayern-in hnehna an chan avangin Champions League match li an khelh aṭangin point ruk an hmu ve leh ta a, last 16 luh beiseina thamral lek lek tawh chu a nung thar ve leh ta.

Allianz Arena-a inkhel an nih avangin Bayern lawm erawh a kim lo ang - German club tan team 'nem' zawka ngaih Benfica laka goal khat 'chauh' khung hi a ṭha tawk lo tiin a sawi theih.

Bundesliga 'Bayern'

Vincent Kompany kaihhruainain Bundesliga lamah chuan Bayern an vul viau a, league match kua khelh tawhah tlawm la nei loin hma an hruai mek. Match sarih chak tawhin, vawi hnih draw an nei a, an hnuai chiaha awm RB Leipzig aiin point thumin an sang zawk.

Bayern hian goal khung pawh an thei pup pup hle. Tun season-ah league goal 32 zet an khung tawh a, goal khung tam lama anmahni hnaih bertu Eintracht Frankfurt lam hian goal 23 an khung tawh - goal kua ngawtin an khung tam zawk tihna a ni.

Goal chhuah lamah pawh Bayern an insum thei viau a, goal sarih chiah an chhuah. Kompany leh a naute aia goal chhuah tlem chu RB Leipzig chiah niin, anni hian goal nga chiah an la chhuah ve thung.

Champions League 'Bayern'

German football-a Bayer Leverkusen an lo lan zawk hnuah Bayer-in an lalṭhutthleng luah leh tumin hma an la mek a, an kal na hle - mahse, Europe lamah erawh eng ruai an ang lo a, coach Kompany rin tawk lohna pawh fans tam takah a awm hman.

Bayern hian an match hmasa berah Dinamo Zagreb chu 9-2 ngawtin sawp mah se, match hnihnaah an hneh tura ngaih Aston Villa chu 1-0 in an ngam lo a, Barcelona khelmualah 4-1 in an mualpho zui bawk.

Dawl zawrin Bayern an zawr a ni ber a, Bundesliga lamah result nei ṭha mah se, Champions League an result avangin fan-te tun season-ah an phur zo meuh lo - European club lian inti tan chuan thil awm lo a ni hran lo.

Manganna

Allianz Arena-ah Bayern-in Benfica an mikhual a, team pahnih squad thlir chuan nuamsaa chak tur an ni. Mahse, tun season-a Champions League-a an result avangin Bayern fan-ten huaisen an harsat a, thin phu chungin an thlir.

Hlauhthawn ang ngeiin Bayern hian goal an khung lawk thei lo. Tun season-a goal 17 ngawt khung tawh Harry Kane pawhin goal a khung thei lo a, English striker hian goal khungna chance nei ṭhin mah se a chhawr thei lo.

Serge Gnabry tan pawh thawnthu a danglam lo - kum 29 mi forward hian goal khung loh zan a hmang em ni chu aw, tih mai turin a chance ṭha a hlah a, Leroy Sane chu Benfica keeper Anatoliy Trubin chuan ṭha zetin vawi hnih a dansak bawk.

An chak ve ta

Bayern hian Bundesliga-a an match hnuhnung paliah goal 16 ngawt khungin, an lamah goal a lut lo a, league lama an result ṭha hi Champions League-ah chhawm nun an duh - mahse, goal khung an harsat tlat.

Minute 67-naah Musiala a inlar ta nge nge a, Benfica tlarhnung tana player hnawksak hian Kane-a siamsak chu goal-ah a chantir - goal dang lut tawh loin Bayern an chak zui a, beiseina sang tak nen Champions League an thlir zui ve thei tawh ang.

Kum 21 mi Musiala hi minute 73-naah Thomas Muller chuan a thlak a, Allianz Arena-a fan-ten ding chungin an zahna an lantir. Tun season inelna hrang hrangah match 13 khela goal riat khungin, assist vawi li a nei.

Hmabak chu

Tun season-ah Champions League kalphung thlak danglam a ni a, team 36-te group-ah inṭhen tawh loin an awm ho vek - team khatin match riat ṭheuh an khel a, club pakhatin team khat laka home & away match an khelh chu tihbo niin, team hrang ṭheuh an hmachhawn.

Match riat khelh hnua a sang pariatte chu round of 16 an lut dawn a, 9-na aṭanga 24-na te chuan playoff khel lehin, round of 16 lut tur an zawng ang - Bayern hi table-ah 17-na an ni mek a, an dinhmun erawh a ṭha lo.

An hmabakah hian Paris Saint-Germain (home), Shakhtar Donetsk (away), Feyenoord (away) leh Slovan Bratislava (home) te hmachhawn tur an la awm dawn a, vawi khat chetsual a pawi thei - Allianz Arena-ah tun season Champions League final khelh a ni dawn tih theihnghilh lo la!