Hmun sawmah Cubarsi hliam ṭhui

Barcelona defender Pau Cubarsi chu Red Star Belgrade nen an inkhelh ṭuma a hliam avangin a hmai hmun sawmah ṭhui a ngai a, Catalan club chuan an player hi dinhmun ngaihtuahawma a awm loh thu an sawi.

Nilaini zan khan Barcelona hian Champions League inkhelah Red Star Belgrade chu 5-2 in an hneh a, he inkhelah hian Cubarsi pawh inlanin, corner aṭanga ball kal a tauhna lamah Red Star centre back Uros Spajic chuan a kein a tlawh fuh.

Kum 17 mi defender hi minute 67-naah a hliam vang hian lakchhuah a ngai a, khelmualah a thisen a chhuah tam avangin fans tam tak an hlauthawng hman hle.

Mahse, inkhelh zawhah Barca boss Hansi Flick chuan a player hi dinhmun ngaihtuahawma a awm loh thu a sawi a, German coach chuan, "Ṭhui a ngai a, mahse, a ngaihtuahawm lo e," a ti a, Barca pawhin social media lamah an defender ṭhangduang thlalak hi pholangin, a caption-ah 'Ka ṭha e" tih an ziak.

Kum 16 mi lek a nih laia club tana a match hmasa ber kheltu Cubarsi hian season hmasa khan Barca tan inelna hrang hrangah match 24 a khel a, tun season-ah match 15 a khel tling der tawh bawk - Spain tan vawi li a inlan tawh.