Leeds an tawlhthlu leh tawh!

Nottingham Forest laka an tlawm hnuin Leeds United an insiamṭha lo a, Thawhṭanni zan khan Championship league match inkhelah Brentford chu 1-1 in an inhnehtawkpui.  

Leeds United an hneh hnuah Forest-in eng ruai an ang bik lo a, rin loh takin table mawng lama awm Charlton Athletic chuan 1-0 in an hneh!

Forest hi an tlawm avangin panganaah an tla thla a, nizan inkhelah Fulham an chak chuan Leeds erawh pathumnaah an tla thung ang - chanchin lawmawm a ni lo. 

Hmahruaitu West Brom chu nizan khan an inkhel a, he thu buatsaih a nih lai hian result kan hre hman lo - an chak chuan pahnihna Leeds hi point sarih ngawtin an tlansan thei ang. 

Inrinni zan khan Leeds United-in Forest chu khualmualah 2-0 in an ngam lo a, Mizo zinga ṭantu pawh ngah tak Leeds coach Marcelo Bielsa chuan a thiam loh a nih thu sawiin ngaihdam a dil hial. 

Mahse 2003-04 season-a Premier League aṭanga an relegate hnua top flight football la khel leh lo team hian Brentford lakah pawh beisei an phak chuang lo a, point khat chiah an hlawh leh ta. 

Leeds hian minute 25-na lekah goal an chhuah nghal a, goalkeeper Kiko Casilla chuan captain Liam Cooper-a back pass chu a kea dang fuh thei loin a chesual a, Said Benrahma chuan hei hi remchangah lain goal-ah a chantir. 

Minute 38-naah Brentford keeper David Raya a chesual ve thung a, hei hi Cooper chuan goal-ah a chantir - hun tawp thlengin goal dang a lut lo a, 1-1 in an ṭin.

Season hmasa khan Leeds United chuan an hun tam zawk top two-ah an hmang a, mahse season tawp hnaih lamah an chetsual avangin pathumnaah an tla thla. 

Pathumnaa an awm avangin Leeds-in playoff an khel zui a, Derby County ngam loin an beiseina a thamral zui - top two-a an awm reng hnuin Leeds dinhmun a derthawng leh ta a, thawnthu hlui a thlen nawn leh hlauin fan-te awm thiam har an ti ṭan. 

Championship-a pakhatna leh pahnihna chu automatic-a season thara Premier League khel tura tling tur an ni a, pathumna aṭanga paruknain playoff an khel ṭhin thung. 

Team paliin double leg hmangin playoff an khel a, a tawpah hnehna chang pahnihin final an khel - final-a chak chu Premier League khel turin an tling leh ṭhin a ni. 

Inrinni zana Leeds an hneh avangin Europe-ah pawh sulhnu nei ṭha Forest an phur thar a, automatic-a Premier League khelh beiseina a nung thar. 

Mahse, tlak hlau Charlton an mikhual zanah Forest-in beisei an phak lo a, minute 24-na lekah goal an chhuah nghal - Lyle Taylor chuan goal a rawn khung a, mualneitu team an hawihai hle. 

Leeds hneh thei Forest-in hun tawp thleng pawhin an si phurh an sut thei lo a, khualmuala match 12 zet a zawna chak zo tawh lo Charlton an chak. 

Championship-ah pahnihna aṭanga 11-na thleng hian season thara Premier League khelh anla beisei thei tih ngam a ni a, a la ngaihnawm chho dawn chauh niin a lang.