Gerrard-a inkhel en man a to dawn

Season tharah Liverpool kawr ha chungin Kop atchilh rawn Steven Gerrard a hmel kan hmu tawh dawn lo a, Liverpool fans tam tak lung a leng lawk. MLS club LA Galaxy pan tur 'Captain Fantastic' tia a hming an phuahsak hian Inrinni a Crystal Palace an hmachhawn hunah Anfield-a Liverpool tana a game hnuhnung ber a khel tawh dawn a, kum 17 chhung Liverpool tana khel tawh Steven Gerrard-a home game hnuhnung ber hmuh chakin ticket an inchuh nasa a, ticket zawrh chhawnna lamah chuan ticket hi an zuar to tawh hlawm hle.

Liverpool-in club tenau anga ngaih an tum in 'Category C' game tih a ni a, club lian an tuma ticket man nena khaihkhin chuan ticket man pawh a hniam ṭhin viau. A tlangpui thuin Category 'C' ticket hi £37 (Rs. 3,720) - £49 (Rs. 4,927) inkara zawrh ṭhin a ni a, Crystal Palace hi 'Category C' team a mi an ni.

Category C game ni mah se Liverpool legend Steven Gerrard-a game hnuhnung ber a nih dawn avangin ticket an inchuh nasa a, ticket zawrh chhawnna lamah ticket man hi a tlawm thei lo.

Crystal Palace an tum hun atana ticket man hi £2,500 (Rs. 25,1402) te'n ticket zuar chhawng ṭhin ṭhenkhat chuan an zuar chhuak hial! Ticket man hi a enna hmun a zirin a tlawmin a to a, 'stand' ṭhenkhata ticket man chu £600 (Rs. 60,336) leh £1,324 (Rs. 13,3142) man bawr vel te a ni a, ticket man zat pangngai ngaihtuah chuan an zawrchhawnna man zat hi a to hle tho a, an hralh thei hle tho bawk.

Inrinnia Crystal Palace nen an inkhelh hunah hian Steven Gerrard pual hian thlahna hun siam a ni dawn a, Liverpool-a a khelhpui player leh Crystal Palace player te'n field chhunga a luh hunah kut beng chungin an lo lawm ang. Kum 17 Liverpool-a a cham chhunga kum 11 chhung Liverpool captain ni thei Gerrard thlah nan Liverpool chuan Reds tan a khelh chhunga Stevie G-a thil tih ropui tak tak te chu tarlan sak an tum dawn bawk a ni. Kum 2013-a football chawlhsantu Jamie Carragher khan Gerrard-a chawimawina ang hi dawng chungin Anfield a lo mangṭha tawh a ni.

England captain hial pawh ni thei Gerrard chuan, "Keimah aiin kan inkhel turah hian mipui in rilru pe zawk se ka duh a ni. Kan tana pawimawh ber chu chak a ni," tiin a chhehvela buai lo turin fan-te a chah.

Crystal Palace an hmachhawn tur hi tun seasona Liverpool game hnuhnung ber tur ala ni lo a, karleh lamah khualmualah Stoke City an hmachhawn dawn. Anfield bika Gerrard-a game hnuhnung ber tur a nih vanga Gerrard thlahna hun hi siam tur an ni.

Liverpool senior player zingah Glen Johnson leh Lucas Leiva te chu Anfield-a Liverpool tana an game hnuhnung ber khel thei dinhmuna ding an ni. Glen Johnson hian season tawp thleng Liverpool-ah contract neiin contract thar zawrh a la ni lo a, amah duhtu zingah German club FC Schalke chu thawm nei lian ber pawl an ni. Brazialian midfielder Lucas Leiva hi season thara chhuak tur anga sawi thuthang a tam hle a, Italin club Napoli chu amah duhtu langsar zinga mi a ni.