Rodriguez-a'n contract thar a ziak

Southampton forward Jay Rodriguez chuan St Mary's Stadium-a kum 2019 thleng cham turin contract thar a ziak.

Kum 25-a upa Rodri­guez hi nikum April thlaa Manchester City nena an inkhelh ṭuma a khup hliam vangin club tan a la inlan leh lo a, training erawh a zawm leh tawh.

Kum 2012 khan Burnley aṭangin Saints hi a zawm a, club tan goal 21 khung tawh. Ram tan November 2013 khan a khel ṭan a, hemi ṭum hian England-in Chile 0-2 in an hneh lo.

Rodriguez chuan, "Ka tan chuan kum harsa tak a ni a, ka hmabak atana theihtawp chhuah hi ka tih tur a ni," tiin a sawi.

English forward chuan sawi zelin, "Club ṭha taka contract thar ka ziak thei hi ka lawm a, tun season-a kan result ṭha tak neih hi minti hlimtu a ni," a ti.

Rodriguez-a contract hmasa zawk kha kum 2016-a tawp tur a ni a, tun season-ah inhliam mah se season liamtaa goal 17 a khung avangin Tottenham nena sawi rik a ni a, a tak ram a thleng lo.

Southampton mana­ger Ronald Koeman chuan, "Jay hi club lian tak tak nena sawi zawm a ni a, kan bula a cham nghet tur hi kan lawm hle a ni," tiin a sawi.