Champions League khel tura Man Utd hmabak

Pathianni zana Liverpool leh Chelsea an inhnehtawk avangin Premier League aṭanga Champions League khel tur a chiang tawhah a ngaih theih. UEFA-in dan thar a hman takah chuan champion Chelsea chu seeded team zingah an tel chiang tawh a, Manchester City leh Arsenal te hi an chesual viau a nih loh chuan pahnihna emaw pathumna an hauh tawh hmel bawk. Premier League-a pakhatna aṭanga pathumna chin hi group stage tling nghal tur an ni a, palinain group stage thleng turin playoff an khelh a ngai - Manchester United hi tun dinhmunah chuan playoff khel tura rin a ni.

UCL kalphung

Champions League-a champion lai an group stage khel turin an tling nghal a, tun ṭuma semifinal lut Real Madrid, Barcelona, Juventus leh Bayern Munich te hi an ram quota hmang thei vek an ni. Hei vang hian Europa League champion-in playoff khelh phawt ṭul mah se season thar bikah chuan groupstage an lut nghal ang.

Group Stage hi UEFA coeffi­cient ranking-a pakhatna aṭanga pathumnain (Spain, England, Germany) club pathum an thawh theih nghal a, palina aṭanga parukna (Italy, Portugal, France) te'n club pahnih an thawh thei a, pasarihna aṭanga 12-na (Russia, Netherlands, Ukraine, Belgium, Turkey, Greece) ram aṭanga champion ṭheuh an tling nghal bawk.

Champion lai (Nakkumah chuan Europa League Cham­pion) nena chhiar telin team 22 te chu groupstage khel turin an tling nghal.

Qualifying Round

Champions League hi ram tenau club tan chuan khelh theih loh tluk a ni a, group stage khel tur ringawt an hmabak hi a ko hle.

First qualifying round-ah associations ranking-a 47 aṭanga 54-na champion te an inel a, chuta chak zawk pali te chuan second qualifying round an lut.

Second qualifying round-ah chak pali bakah associations ranking-a 16 aṭanga 46-na te an inel leh a, team 34 inelna a ni.

Third qualifying round aṭangin Champions Route leh League Route a ṭhendarh a ni. Champions Route (team 20)-ah hian association ranking-a 13 aṭanga 15-na club-te leh second qualiyfing round-a chak team 17 te an inel a. League Route (team 10)-ah association ranking-a 7 aṭanga 15-na ram aṭanga pahnihna club pakua leh association ranking-a parukna ram (France) pathumna te an inel bawk.

Playoff Round-ah Champions Route hi a kal hrang zel a, third qualifying round-a chak 10 te an inkhel leh a, a chak panga ten Champions League groupstage an lut.

Playoff Round League Route hi Manchester United tel theihna chiah chu a ni a, team 10 inelna niin panga tling tur an ni. League Route-ah associa­tion ranking-a pakhat aṭanga pathumna ram club palina, association ranking-a palina leh pangana ram club pathumna bakah third qualifying round (League Route)-a chak panga te an inel leh bawk.

United hmachhawn theih

Louis van Gaal-a team te hi Playoff-ah La Liga leh Serie A palina te nen an awm ho dawn a, Italy leh Portugal-a pathumna team pawh hi khelh harsa tak tur an ni.

Playoff bikah chuan Man­chester United hi coefficient raking (10-na) a sang ber an nih avangin Spain aiawh tel thei tura ngaih Valencia emaw Sevilla emaw bakah Napoli, Bayer Leverkusen leh Shahktar Donetsk te an tum lo thei ang. Chutihrualin club ṭha Roma, Lazio, Monaco, CSKA Moscow leh Besiktas te an tum theih dan a awm tho.

2013 playoff round-ah khan Lyon leh Real Sociedad an inhmachhawn a, PSV Eindhoven leh AC Milan an inkhel bawk. 2014-ah Lille leh Porto an inkhel a, Napoli leh Athletic Bilbao te an insu bawk.

Manchester United hian Premier League match hnu­hnung pahnih an hmabakah hian Manchester City emaw Arse­nal emaw an zuan khum loh chuan season thara Champions League khel ngei ngei tura dah a la thiang bik lo.