Depay-a'n Ronaldo a tluk thei ang - Fer

Netherlands midfiel­der Leroy Fer chuan ram tana a khelhpui Memphis Depay chu Manchester United player hlui Cris­tiano Ronaldo anga a ropui theih thu a sawi.

Fer leh Depay te hian United manager Louis van Gaal-a kaihhruaina hnuaiah Netherlands chu 2014 FIFA World Cup-ah pathumna an nih pui a, season tharah PSV midfielder Depay hian Van Gaal-a hnuaia khel turin United a zawm dawn.

QPR midfielder Fer chuan, "League harsa tak a nih thu ka hrilh a, amaherawhchu player ṭha a a nih avangin Manchester-ah hian nasa takin a hming a chher thei a ni. Ronaldo angin a sang lo a, mah se a chak ṭha a, a rang a, goal a khung thei bawk," tiin a sawi.

Depay fak chhun­zawm zelin Fer chuan, "Tun dinhmunah chuan Ronaldo hi a ropui zawk daih a, mah se Memphis hi kum 21 leka upa a ni. Manchester United-ah hian Ronaldo sulhnu neih ang kha a rawn chhunzawm thei a ni. Memphis ka duhna chu hlauhthawnna a neih ngai lo hi a ni. Robin van Perise leh Daley Blind te awm tawh a, anni pahnih puihna nen hian Van Gaal hian player ṭha zawkah a siam ang," a ti.