Europa League Thirlawkna Zaniah final lut tur chinfel a ni dawn
Zanin dar 12:30 hian Europa League semi final second leg khelh a ni dawn a, tun thla tawp a Warsaw a final khel tur chin fel a ni ang. Spanish club ṭha Sevilla chu Italian club Fiorentina khelmualah an leng lut anga, Rafael Benitez a naute Napoli chu Ukrainian club Dnipro Dnipropetrovsk khelmual Dnipro-Arena-ah an leng lut bawk ang.
Sevilla dinhmun a ṭha tawh
Sevilla hian an khelmual hmanthiam Ramon Sanchez Pizjuan-ah May 6 khan an mikhual Fiorentina chu 3-0 a an lo hneh tawh avangin zanin hian an dinhmun a ṭha zawk hle a ngaih a ni. Kha inkhelah khan Aleix Vidal chuna goal hnih a thun bakah Kevin Gameiro chuan goal khat a khung bawk a nih kha.
Chak an duh a nih chuan Fiorentina hian hamrik hmasa ber a rik aṭangin thapui an thawh a ngai dawn a, an inkhelh hnuhnung berah Fiorentina hian Empoli chu 3-2 a an hneh avangin inrintawkna an neih phah ngei tura ngaih a ni.
Fiorentina hian inhliam vangin Micah Richards, Giuseppe Rossi leh Juan Manuel Vargas te an chhawr thei dawn lo a, hei hi an khingpui tur Sevilla tan chuan chanchin ngaihnawm a nih ngei a rinawm. Hetih lai hian Sevilla tan goalkeeper Beto leh defender Nicolas Pareja te pawh an hliam ala dam loh avangin an inlan thei bik lo ang.
Fiorentina sporting director Daniele Prade chuan, "Football-ah chuan thil theihloh a awm lo, chuvangin zanin kan inkhel turah pawh hian chak zawk tur sawi lawk theih ala ni bik lo. Kan khelmual hi kan hmangthiam em em a, fans ṭhahnem tak an rawn pung kawm ngei bawkin ka ring a, chuvangin kan chak theih kan la in beisei," tiin a sawi.
Rafael Benitez tan fiahna
Zanin hian Ukraine ramah Europa semifinal second leg khelh a ni dawn a, Spanish manager Benitez atan fiahna paltlang hun a ni dawn. An inkhelh hmasak ṭumin Napoli hian ball chang tamin goal khungna hun ṭha nei tam viau mah se a pawimawh goal an khung tam thei lo a, 1-1 a an inhnehtawk avangin zanin hian goal an khung ngei a ṭul dawn a ni.
Dnipro Dnipropetrovsk hian an club history a Europa final lut turin zanin hian goal an khung ker a ṭul lo a, minute 90 chhung an goal an venghim tluan thei a nih chuan a tawk ang. Napoli hian tlarhmah player ṭha tak tak Gonzalo Higuain, Jose Callejon leh Marek Hamsik te an neih avangin Dinpro tan goal ven ngawr ngawr afinthak ber lo maithei.
Player pawimawh Serhiy Kravchenko, Roman Zozulya leh Yevhen Shakhov te an chhawr thei lo tur hiDinpro tan chuan chanchin duhawm lo tak a ni chiang ang a, mahse striker Yevhen Seleznyov a dam avangin goal hmaah an hlauhawm leh ang. Ukrainian striker hian an inkhelh hmasak ṭum khan an siphurh sutna goal a khung nghe nghe.
A vawithun nana Europa League champion nomawi chawi tum tu Benitez chuan, "Khualmual a khel tur kan nih avangin kan dimhum a chhe bikah ka ngai lo. Kan inkhelh hmasak ṭum pawh khan kan vanduai vang chauhin goal kan khung tam lo a ni a, zaninah chuan goal khat aia tam kan thun ngei ka beisei," tiin a sawi. Benitez hian Valencia leh Chelsea a enkawl laiin Europa champion nomawi a lo chawi tawh a ni.