Delhi chakna Shreyas Iyer

Thawhlehni zan khan India Premier League-ah inkhel pakhat a awm a, chak hleithei lo Delhi Daredevils-in chak hmel hmu in Chennai Super Kings chu wikcet rukin an hneh.

Shaheed Veer Narayan Singh International Stadium, Raipur-a inkhelah hian bat hmasa zawkah Chennai an ṭang a, over 20-ah run 119 vawchhuakin mi paruk an hloh. Chennai tana run siam hnem ber Faf du Plessis chuan ball 23 a hmachhawnah run 29 vawchhuakin CSK batsman te an che hleithei lo a ni ber.

Delhi-in theihtawp chhuahin an target an um a, over 16.4-ah run 120 vawchhuakin mi pali chiah an hloh a, an chak chiang hle. Delhi tan Shreyas Iyer hmuhnawm khawpin a khel a, kum 20 leka upa India batsman hian ball 49 a hmachhawnah run 70 vawchhuakin a team a chakpui chiang hle. Vaibelchhe 16 hlawhtu Yuvraj Singh chuan ball 28 a hmachhawnah run 32 rawn vawchhuak ve bawkin Iyer-a arawn thlawp ṭha hle.

Zaheer Khan chuan over li a vawmah run kua chiah pe in wicket hnih a la bawk a, bowling lamah Delhi tan innghahna a ni.

Zanin dar 8:00 hian Wankhede Stadium, Mumbai-ah Mumbai Indians leh Kolkata Knight Riders te an inkhel leh ang.