Europa khelh kan hlau lo - Monk
Swansea manager Garry Monk chuan season thara Europa League khel tura tlin an hlauh loh thu a sawi.
Swansea hian point 56 hmuin Premier League table-ah pariatnaah an awm mek a, an chunga awm Southampton point khat chauhin an pha lo. FA Cup final-a Champions League khel pha tawh Arsenal-in Aston Villa an hneh chuan pasarihna chin hi Europa League khel pha tur an ni.
Monk chuan, "Europa League khelh hi hlauhna tur kan nei lo. Nikum khan tawnhriat ṭha tak kan nei a, nuam kan ti hle a ni. Mipui chuan European competition kan khelh vangin league-ah harsatna kan neih thu an sawi a, amaherawhchu kan khelh theih phawt chuan kan talbuai phah lo ang," tiin a sawi.
Swansea hian 2013-14 season khan Europa League an khel a, last 32 an paltlang lo.
Welsh club hian season tawp hmain Manchester City leh Crystal Palace an la hmachhawn dawn a, Monk chuan, "Kan match hnih khelh hmabakah hian player-te theihtawp chhuah turin ka fuih. Arsenal kan hneh
ṭum khan point hlawhchhuah kan tum tih a chiang a, kan khelh leh turah pawh a danglam lo ang. Europa League kan khelh erawh chuan squad tihchhah deuh chu a ngai ang. Chutihrualin Tottenham emaw Southampton emaw hian point an la hmuh belh ngei dawn a, point thum emaw li emaw kan hmuh theih ka ring. A bak chu midang result-a innghah a ni," tiin a sawi.