Aguero hi a ṭha tulh tulh ang - Pellegrini

Manchester City manager Manuel Pellegrini chuan a srtiker chhuanvawr Sergio Aguero chu a ṭhat tulh tulh thu leh defender te tan hnawksak a nih zel tur thu a sawi.

Tun season-ah Aguero hi Premier League goal khung hnem ber a ni mek a, goal 25 a khung tawh. Inelna hrang hrangah a club tan hian tun season-ah goal 31 a khung tawh. City tana season lina hmang mek Aguero hian a club tan hian goal 106 a khung tawh a ni.

Kum 26 a upa Aguero hian kartawp inkhelah khan QPR lakah hat-trick a siam a, tun seasona a vawithum hat-trick siamna chiah a ni. Aguero goal hmang hian Man City chuan QPR chu EPL aṭangin an pet chhuak nghe nghe.

Pellegrini chuan, "Aguero inkhel kha hmuh hian ka lawm ṭhin, a hmasawnna ka hmuh hian ka lawmna a zual ṭhin bawk. A thawkrim em em a, ball chang turin a beih nasat vangin ball pawh a chang tam a, a hlauhawm hle bawk.Kum 26 chauh ala nih avangin hmasawnna tur ala neiin hma ala sawn zel dawn a, defender te tan chuan dan a harsa tulh tulh ang. Kum khat liamta a 'Kun' kan hmuh ai khan tuna 'Kun' kan hmuh hi chu a ṭha daih tawh zawk a ni," tiin a sawi.