Champions League Thlirletna Barcelona-in Berlin an pan dawn

Allianz Arena-a Barcelona tana goal hnih khungtu Brazil captain Neymar tluk zetin Luis Suarez a langsar a, Lionel Messi pawh a awm mai mai lo.

Thawhlehni zan Champions League semifinal second leg inkhel­ah Bayern Munich chuan an mikhual Barcelona chu 3-2 in an lo hneh. Amaherawhchu, first leg-ah 3-0 a an hneh loh tawh avangin inkhel pahnih belh khawmah Barca hi 5-3 a chakin Berlin-a final khel turin an tlang ta zawk a ni.

Inkhel chu

Goal thum tam mamawh Bayern-in hamrik hmasa ber a rik rualin goal khung tumin Barca goal an nawr nghal a, goal pawh an hlawhchhuak hma hle. Real Madrid midfielder hlui Xabi Alonso ball vawrh ṭha tak chu minute 7-na lekah Medhi Benatia chuan a tuah lut nghal a, Sergio Busquets ven ṭhat tawk loh vang a ni.

Bayern an phur a, fans authawm a bengchheng ngei mai. Mahse an phur luatah an tlarhnung a pawp zui. Lionel Messi chuan ball la lutin Luis Suarez-a tan through ball ṭha tak a pe a, Uruguayan forward hian Bayern goalkeeper Manuel Neuer chauh a hmachhawn tawh tihah Neymar atan a siam sak a, Brazil captain hian a hlah lo. Mahni hmasial lo Suarez a ṭhianten an lawmpui ngei mai.

Robert Lewandowski leh Thomas Muller ten Barca tlarhnung chhaihbuai ṭhin mah se goal hlauhawm an nei chhunzawm thei lo. Barca tan Suarez a langsar a, penalty box chhungah ball changin vengtu nei lo a lo ding Neymar a pass a, Neymar hian minute 29-ah Bayern goal dinglam kilah kawh zetin a pet lut. Inkhel hmasa nen belhkhawmin 5-1 chiah a ni.German champion hian goal thum tumin vawi tam Barca rum ṭhaih ṭhin mah se goalkeeper Ter Stegen-a chet ṭhat zan a ni a, an sutlang zo lo.

Second half-ah Barca-in an khelh dan an thlak a, khel ṭha ber Suarez aiah Pedro an luh tir a, final lut chiangah an indah tawh tih a chiang. Bayern tan duhthlan tur dang a awm tawh lo a, goal phurh belh huam a nawr a ṭul tawh. Midfield-ah Bastian Schweinsteiger a thawhhlawkin a thawkrim a, ani hian minute 59-naah Lewandowski goal thun tur a siamsak.

Pep Guardiola nauten beiseina tlem an nei thar leh a, huaisen takin goal khung tumin an bei zui zel. An thawhrim rah sengin vawi tam tak goal khungna hunṭha a neih bawh pelh tawhtu Muller chuan minute 74-ah box pawn aṭangin kawh zet maiin an goal thumna a khung.

Bayern hian an si phurh sut zawh tumin beiseina nen goal khung belh tum mah se hamrik hnuhnung ber a rik thlengin Gerard Pique leh Javier Mascherano te an dingkhawng tlat tawh. Bayern-in an goal khung ṭhelh tam tak an ui hle ang. Barca lamin first leg a an chet ṭhat leh khualmual a goal hnih an thun theih an lawm thung.

Ngaihnawm

Bayern hian an muala Barca an hneh avangin an record - Champions League-a vawi 10 a zawna chak an tluk pha tur chu an dang a, Moroccan defender Medhi Benatia goal kha minute 645 hnua Barca goal chhuah lehna hmasa ber a ni bawk.

Barcelona hian 2006, 2009 leh 2011 khan Champions League final an lut a, an champion vek. Tun ṭum hi ṭum 18 final an luhna chiah a ni.

South American trio Messi (53), Neymar (37) leh Suarez (24) te'n inlena hrang hranga goal 114 an khung tawh a, anni hi Barcelona game ti famkimtu an ni.