Messi hi Pele tlukin a ṭha - Guardiola

Bayern Munich coach Pep Guardiola chuan Lionel Messi chu Brazil legend Pele nen a khai khin a, a club hlui Barcelona chu Champions League nomawi chawi tur­in duhsakna a hlan bawk.

Kum 44-a upa Guar­diola chuan, "Messi hi foot­baller piang tawh a player ṭha ber a ni a, Pele nena khaikhin theih a ni," a ti.

Spanish manager hian a player hlui Messi a fak rualin Pele a dah san zia a sawi lang tel. Player ropui pahnih hunlai hi kum 50 dawnin a dai dan a, inkhelh dan kalphung a danglam nasat tawh avangin khaikhin theih vak a ni lo. An record thlirin Pele a chungnung a, amaherawhchu player ropui pahnih bikah hi chuan statistics hian player ṭha zawk a sawi fiah lo.

Pele Messi

694 Club Games 510

650 Club Goals 418

92 Caps 97

77 Goals 45

727 Total Goals 463

Caps : Ram tana khelh zat

Allianz Arena-ah Barcelona tan Neymar-a'n goal hnih a khung a, Pep Guardiola fak duh zawk erawh Nou Camp-a goal hnih khungtu Messi a ni. Bayern boss chuan sawi zelin, "Barcelona ka enkawl hunlai khan amah enkawlna hun ka nei thei kha a lawmawm takzetin ka hria. Tunah hian a ṭhat lai ber a tawng leh mek a ni," tiin a sawi. Guardiola leh Messi hian kum 2008 aṭanga 2012 chhung khan nomawi 14 an chawi.

Messi hian tun sea­son-ah goal 53 a khung a, season liamta khan inhliam leh tax pek loh thubuaiin a tihbuai a, goal 44 chauh a khung.

Treble champion an sawi ri

League, Cup leh Cham­pions League-a champion hi treble champion tih a ni a, he record hian ngaihhlut a hlawh hle.

Manager Luis Enrique chuan season khat Catalan club a enkawlnaah tre­ble champion thei din­hmunah a dinpui.

Barca hi La Liga hma­hruaitu niin Copa del Rey final-ah Athletic Bilbao an hmachhawn dawn a, Champions League final an lut leh ta bawk.

Barca boss Enrique chuan, "Final thlen hi hlawh­tlinna ropui tak a ni. Inelna pathuma champion turin match khat ṭheuh bak kan mamawh tawh lo. Treble champion hi kan tum a ni a, Barca-a tel ve nawmna chu result ṭha neih hi a ni," tiin a sawi.

Kum 45-a upa Enrique hian nikum nipui khan Tata Martino a thlak a, hemi hma hian Roma leh Celta Vigo te a enkawl tawh. Enrique hi kum 1996 leh 2004 chhung khan Barcelona player pawimawh a ni.

Inkhel chungchang sawiin Enrique chuan, "Player-te khelh danah ka lawm a, team pumpuiin chak kha kan phu a ni," tiin an khelh danah a lungawi thu a sawi.

Dan theih loh Barca

Bayern skipper Phi­lipp Lahm chuan, "Thilmak kan ring a, kan thlen tir thei lo. Minute 90 chhung Barca player dan kha theih loh a ni. Kan mualah kan tlawm lo a, first leg-ah kan tlawm a ni," tiin an chak lo a pawm thu a sawi.