Bale-a agent khaktu Ancelotti

Real Madrid boss Carlo Ancelotti chuan a player pawimawh zinga mi Gareth Bale-a agent chu ṭawng tam lutuk tiin a sawisel.

Welsh winger Gareth Bale-a agent Jonathan Barnett chuan kar hmasa khan Real Madrid-a Bale a team-mate te chuan Bale hnenah ball an pass tam tawk lo nia sawiin, Spurs aṭanga Real zawmtu hian a ṭhiante hnen aṭanga thlawpna a hmuh ṭhat tawk loh avangin a khel ṭha thei lo niin a sawi.

Bale-a agent ṭawng­kam hi Ancelotti chuan a ngaithei lo hle a, khawvel coach hlawhtling ber pawl chuan, "Mi ṭawng duh leh kam tam tak tak chenna khawvela khawsa kan ni a, chutiang mi te chuan a chang chuan eng thu nge an sawi pawh an hre ngai lo a ni," tiin Jonathan Barnett chu na takin a khak.

Kum 55-a upa Italian manager chuan, "Bale hian a ṭhiante nena an inkarah buaina engmah a nei lo a, a ṭhiante pawn Bale lakah eng harsatna mah an nei lo," tiin khaw­vel player man to ber Gareth Bale chuan buaina a neih loh thu a sawi.

Ancelotti a ang tui laklawh a, AC Milan leh PSG te pawh lo hlawhtlinpui tawhtu manager chuan, "Bale-a agent hi kan training neihnaah vawikhat pawh a la rawn tel lo a, kan team boruak engmah hriat nei lo chungin pawn lam aṭangin a lo rak ve mai mai a ni,"a ti.

Tun season a match 44 khelh tawha goal 15 chiah la khungtu Gareth Bale hi tunhnaiah a khelh ṭhat ṭhin loh avangin fan ṭhenkhat aṭangin au el hial a tawk ṭhin. Mahse Ancelotti chuan a player hi chhan tlatin, " Bale-a agent hi lo ngawi rih mai mai rawh se. Tun season-a Bale khelh dan hian minti lawm tawk hle a ni," tiin pound maktaduai 85.3-a Real zawmtu winger khelh danah a lawm thu a sawi.