CYMA FOOTBALL Bawngkawn an thiam, Armed Veng 'S' leh Durtlang 'N' pawh tlang

14th May, 2015

Nimin khan Lammualah C.T Group Cup Inter Branch YMA Football Tournament 2015 Round of 16 chu khelh zawh a ni ta a, Durtlang 'N', Armed Veng 'S' leh Bawngkawn ten an tumpui ṭheuh hnehin quarter final an lut. Anni pathum hma hian Armed Veng, Venghlui, Dinthar, Lengpui leh Bethlehem Vengthlang te chuan last 16 an lo paltlang tawh bawk.

Last 16 zawhni inkhelah hian match hmasa berah Durtlang 'N' chuan 2-1 in Bungtlang an hneh. Inkhel ṭan aṭanga minte khatna lekah TC Malsawmtluanga goal thun hmangin Bungtlangin hma an hruai a, first half chhung chu an goal hi an hum tluan thei. Mahse, second half-ah Durtlang 'N' lamin thapui an rawh thawh ve leh a, minute 64-ah Benjamin Laltlingzova chuan penalty aṭangin an si phurh sutna goal khungin Lalrinmawia chuan Bungtlang defender tihsual nangchingin minute 81 naah Durtlang 'N' chakna goal a khung leh a ni.

Armed Veng 'S' in si an phurh zet hnuah Chawnpui an lehthal a, nimin inkhel thawh hnihnaah 2-1 in hnehna an chang. Minute 42 na a Lalramnnghaka goal thum hmangin Chawnpuiin 1-0 in hma an hruai a, goal khat phur chungin Armed Veng 'S' in chawlhlawk an hmang. An thawhrim rah sengin Lalreammuanpuia chuan minute 59-ah an siphurh sutna goal a khung. Armed Veng 'S' an phur chhunzawm a, minute 79-ah Lalnunsanga hmangin an goal hnihna leh he inkhel agoal hnuhnung ber a khunga ,2-1 in Chawnpui an chak lo.

Inkhel hnuhnung berah Bawngkawnin an thiam zia an pholang leh a, MPL club nei veng Chanmari 'W' chu 5-3 in an hneh. Inkhel ṭan aṭanga minute lina lekah Eric Zomuanpuia chuan goal khungin Chanmari 'W' hma hruai pui mah se, he goal hian Bawngkawn a chhaih kawlh chiang hle. H Lalmuankima goal hnih leh F Lalrozama, Lalnuntluanga leh MS Dawngliana te goal khat ṭheuh thun hmangin an chhang let. Cahnmari 'W' tana Lalṭanpuia leh Vanlalbiaa Chhangte te goal thunin awmzia a nei tawh lo.

Bungtlang 1 - 2 Durtlang 'N'

Bungtlang : TC Malsawmtluanga 1'

Durtlang 'N' : Benjamin Laltlingzova 64'(P) ; Lalrinmawia 81'

Chawnpui 1 - 2 Armed Veng 'S'

Chawnpui : Lalramnghaka 42'

Armed Veng 'S' : Lalrammuanpuia 59' ; Lalnunsanga 79'

Bawngkawn 5 - 3 Chanmari 'W'

Bawngkawn : F Lalrozama 15' ; H Lalmuankima 45', 64' ; Lalnuntluanga 78' ; MS Dawngliana 70'

Chanmari 'W' : Eric Zpmuanpuia 4' ; Laltanpuia 66' ' Vanlalbiaa Chhangte 82'

Lammualah inkhel

hmuhnawm a awm dawn e

Vawiin tlai dar 4:30 hian quarter final match hmasa ber chu Armed Veng leh Venghlui ten an khel ang.

Inkhel hnuhnung zawkah Dinthar leh Bethlehem Vengthlang te an inkhel dawn bawk a, ṭantu nei tam veng pali an inlan dawn avangin tlailam Lammual boruak a hot hle ang.

Armed Veng hi football thiam veng an nih ang ngeiin NECS Cup 2015 champion nomawi kawl mek tu an ni a, hei chauh hi an la duhtawk mai lo. CYMA football champion nomawi nena kawl kawp tum an nih avangin semi final-ah hian an duhtawk mai lo ang.

Armed Veng khingpui tur Venghlui hian tun hmain hnuhma an lo nei lian ṭhang lo pawh a ni thei e, tunah erawh chuan hnuhma liamtham hnutchhiah ngei tumin ṭan an la tawh. Champion an tum ngam chiah lo a nih pawhin final luh an duh ngei ang. Inkhel hmuhnawm tak beisei phawt ang.

Chhun khawlum boruak a chhuak peih lo tan pawh zan dar 6:30 a Dinthar leh Bethlehem Vengthlang inkhel en tur a Lammual pan a harsa lo ang. Bethlehem Vengthlang hi an khawtlang an ṭangrualin an inbuatsaihna a ṭhat avangin champion tum ngam an ni. Final lut tur pawhin player an nei ṭha tawk hle.

Tualchhung football-ah chuan Dinthar aia fans nei ṭha hi an awm kher lo ang. Eng tournament-ah pawh champion tum ngam turin an inbuatsaih ṭhin a, tun ṭumah pawh hian a tawp rak thlengin an ṭang leh dawn chiang. Inkhel tur te hi MPL club ve ve nei veng an nih avangin inkhel ten an thiam tawh hle.

QUARTER FINAL FIXTURE

Vawiin Inkhel tur

04:00 PM Armed Veng Vs Venghlui

06:30 PM Dinthar Vs Bethlehem VT

Zirtawpni Inkhel tur

04:30 PM Lengpui Vs Durtlang 'N'

06:30 PM Armed Veng 'S' Vs Bawngkawn