Rome-ah Djokovic a chak nghal

Kar thum zet a hah­chawlh hnuah Novak Djokovic chu court-ah a rawn kir leh ta a, a match hmasa berah Nicolas Al­magro hnehin Italian Open third round a in hlangkai.

Nikum khan Djokovic hi Italian Open-ah hian alo champion tawh a, kuminah pawh hian player hlauhawm leh chak tura rinkai ber a ni leh mek. Serbian tennis star Djokovic hian a khingpui Spanish mi Almagro chu 6-1, 6-7 (5-7), 6-3 in a hneh. Djokovic hian set khat na chu harsa lo takin la nghal mai mah se set hnihna ah erawh Almagro a rawn ṭang thei hle a, 7-6 a set la letin set thumna khelh a ngaih phah. Final set-ah erawh world number 1 hian 6-3 in hnehna a chang a ni.

Kum 27 a upa Djo­kov hian third round-ah Spain lam chhuak Roberto Bautista Agut a hmachhawn leh ang. Second round inkhel dangah Tomas Berdych chuan 6-2, 6-4 in Matteo Donati a hneh a, inkhel dangah David Ferrer chuan a khingpui M. Donati chu inkhel inhnehtawk takah 6-4, 7-5 in a hneh bawk.

Season ṭan nana ATP Masters pathuma champion vek thei Djo­kovic chuan, "Ka inkhelh tam avangin ka taksa a chau tawngkawng ang tih ka hlau a, chuvangin kar thum chhung chu ka chawl reng a ni. Tunah chuan inkhel turin ka inpeih leh tawh a, a hun takah ka rawn kir leh niin ka hria. Inkhel awlsam tak a nilo na chungin ka khel chhe hranlo in ka hria," tiin a sawi.

Hmeichhe lamah world number 1 Se­rena Williams chuan a khingpui Anastasia Pavlyuchenkova chu 6-1, 6-3 in awlsam takin a hneh a, inkhel dangah Maria Sharapova chuan Jarmila Gajdosova chu 6-2, 3-1 in a hneh bawk. Australian Gajdosova hi set hnihna an khelh lai hian a hliam avangin a inkhel tluan thei lo a ni.

Sharapova chuan, "Rome-ah hian ka clay court season tak tak chu a inṭan ve dawn chauh. Tun ṭum chu a hma aiin ka inbuatsiah ṭhat theih avangin beiseina ka nei lian ve hle. Amah­erawhchu, player ṭha tak tak an tam tawh avangin eng round-ah pawh hian chetsual theih vek a ni," tiin a sawi.