Hmahruaitu Liverpool khelmualah Aston Villa

Premier League table chung ber luah mektu Liverpool chu zanin dar 1:30 hian league match khel turin an inlan dawn a, season hmang ṭha tak Aston Villa an mikhual ang.

Reds hian tun season-a league match 10 an khelh tawhah vawi khat chiah tlawm an la nei a, vawi khat draw neiin, vawi riat an chak - table chung berah an awm a, anmahni hnaih bertu Manchester City aiin point hnihin an sang zawk.

Liverpool-in season an hman ṭhatzia media-ten hahipin an sawi a, chutihrual chuan City nena an inkar hian vawi khat chetsual pawi theihzia a la tarlang tel - hei vang hian mahni muala Villa ngam loh an duh lo ang.

Season hnih liam ta vel mai kha chu ni se, Villa hi Reds tan hneh chiang sa ang hiala sawi theih tur a ni. Mahse, tunah chuan Premier League club vantlang ṭhin kha Champions League khel club an ni tawh a, thawnthu a danglam tawh.

Season duhawm

Reds fan-ten an coach ngainat rawn Jurgen Klopp chân mah se Arne Slot an nei tawh a, Dutch coach kaihhruaina hnuaiah Merseyside club hi an kal vung hle - tun season-a match 16 an khelh tawhah vawi 14 an chak thei.

Liverpool boss Arne Slot hi Premier League manager zinga club enkawl hmasak ber season-a match 16 leka match 14 chak thei hmasa ber a ni a, a bak match hnihah hian vawi khat tlawmin, vawi khat draw an nei.

Reds hian tun season Premier League-ah goal 19 ngawt khungin, an lamah goal ruk chiah a la lut. Goal chhuah tlem ber an ni a, goal khung tam lamah tluk loh pathum chiah an nei - tlarhma leh tlarhnungin hna an thawk ṭha kawp tihna a ni.

A tawi zawnga sawi chuan Villa tan Liverpool khelmualah ven tur bik a awm lo a, fimkhur taka khelh a ngai tihna a ni. Champions League-ah pawh Liverpool hi team 36 inlan zinga match li chak vek awmchhun an la ni rih a, hma an hruai mek - goal khat chiah an la chhuah a, match liah goal 10 an khung tawh.

Tehna chu

Liverpool-in bul an ṭan ṭhat avangin fak an hlawh a, hetiang boruak karah hian coach Arne Slot erawh fimkhur takin a ṭawng ve reng. Dutch coach hian, "November thla tawp lamah min teh rawh u," tiin a lo sawi tawh a, an fixture hautakzia a sawina a ni.

Tun dinhmunah chuan he team hian 'Ber thla fiahna' hi an paltlang hneh rih viau! Tun hnai ni 187 chhungin Liverpool hian inelna hrang hrangah match ruk an khel a, Germany leh England inkartawn chungin an khel - mahse, tlawm an nei miah lo!

Anfield-a Chelsea (2-1) an hneh hnu lawkah Champions League-ah RB Leipzig (1-0) lenchilhin an chak chhunzawm a, Arsenal (2-2) khelmualah vannei zo lo mah se, Brighton & Hove Albion chu League Cup (3-2) leh league (2-1) ah a zawnin an hneh a, German champion Bayer Leverkusen chu UCL-ah 4-0 in an sawp zui.

Liverpool-in fiahna an paltlang hnai a, mahse, Villa zawhah international break hmang zuiin Southampton (away, November 24), Real Madrid (home, Nov 28) leh Manchester City (home, December 1) an hmachhawn zui ang - an hmabak match hautak inpuahchah nan international break hmaa Villa hneh hi a pawimawh.

Liverpool an ṭha

Slot-a'n tun season-ah squad a siksawi fo a, hei hi Reds khelh ṭhat chhan a tih loh theih loh - zaninah pawh inhliam Harvey Elliott (ke phah), Federico Chiesa (fitness), Alisson Becker (malpui) leh Diogo Jota (nak) te la nei mah se, Liverpool tan buaina an tling lo.

Tlarhmaah Mohamed Salah a la 'form' reng - inelna hrang hranga match 16 a khelhah goal kua leh assist vawi kua a nei tawh a, Luis Diaz 'class' kan hmu telh telh. Leverkusen laka hattrick siamtu hian match 15-ah goal kua leh assist vawi hnih a nei bawk. Tun hnaiah Cody Gakpo a che ṭha a, heti chung hian Salah tih loh 'khel ngei dawn' tia sawi ngam an awm lo a, zaninah Darwin Nunez a lut a nih chuan Gakpo hi chawl hahdam tur a nih a rinawm.

Left back-ah Andrew Robertson leh Kostas Tsimikas an inluh chhawk ṭhin a, zaninah chuan Robertson luh a rinawm zawk. 4-0 ngawta Leverkusen an sawpnaah Dominik Szoboszlai hahdamtir a ni a, zaninah chuan Curtish Jones aia lut tura beisei a ni.

Midfield-ah tlarhnung venpui turin Alexis Mac Allister leh Ryan Gravenberch an awm leh ang a, captain Virgil van Dijk, Ibrahima Konate leh Trent Alexander-Arnold te chu bul ṭan chiang an ni a, Caoimhin Kelleher pawhin si ban a nghak leh ang.

Hei le Villa

Villa-in season bul an ṭan ṭhat thu kan sawi rualin, tun hnaiah an chesual - result duhawm lo an neih chhoh lai tak a ni a, insiamthar an mamawh lai boruaka Anfield lenluh hi chu an thil châk loh ber zinga mi a ni dawn.

An league match hmasa pangaa vawi li chak thei Villa hi a hnuhnung pangaah vawi khat chiah an chak a, vawi thum draw neiin, vawi khat an tlawm. Champions League-ah pawh Emery naute an chesual zui.

UCL match hmasa pathuma chak a, Bayern Munich meuh pawh hnehtu team hi Belgian club Club Brugge khelmualah 1-0 in an tlawm a, he inkhelah hian centre back Tyrone Mings chuan keeper Emi Martinez ball pek chu a kutin a man - inkhelah rilru a pe tawk lo a, penalty an chawi zui.

Belgian club-in penalty hi goal-ah an chantir a, Villa an hneh. Belgium-a an zin chauh piahlamah result duhawm lo an nei a, hemi hma chiah hian league-ah Tottenham Hotspur chuan 4-1 in an sawp bawk - tlarhma nei ṭha Liverpool lakah fimkhur a finthlak ang.

Duhawm taka season bul kan ṭan hi mak ka ti hran lo - a chhan chu ka naute theihna hi ka hrechiang em a ni. Chutihrual chuan thiam viau mah ila, kaltluan a ngai ve tho bawk. Ni tina ka player-te thawhrim dan hmu tu ka nih avangin kan khel ṭha hi mak ka ti hran lo.

A chang chuan vanneihnain kan lam a ṭang tih pawh ka hai bik lo. Kan result tam zawkah kan phu reng vangin kan chak a, chutihrual chuan hlauthawn deuh deuhna pawh kan nei ve tho. A khaikhawm nan chuan, ka naute thiamzia ka hriat avangin kan result ṭha hi mak ka ti lo. He team ka zawm tirh khan hlawhtlinna chang tura an thawhrimzia ka hmu nghal a ni.

Ka player-te chunga beiseina hi a hranpa taka buaipui pawh ka tum lo. Chutiang kan sawi ngai lo - kei chuan ni tin an theihna sang ber chhuah reng se ka duh a, thawkrim reng se ka duh a ni mai. Chutianga kan tih phawt chuan result chu a lo awm mai. Match zawng zawng chak vek ka beisei hauh lo a, mahse, ni tin tha thlah loa beih kan tum thung.

- Arne Slot,

Liverpool manager