Old Trafford-ah Man United Vs Chelsea

Manchester United chuan zanin dar 10:00 hian Old Trafford-ah Chelsea an mikhual dawn a, Premier League inkhel pawimawh leh hmuhnawm a ni ang.

Chelsea-in player kim loin season bul a ṭan a, United nena an inkhelh turah erawh Frank Lampard-a'n a duh thala player thlan tur a nei tawh dawn.

Blues tlarhnung a phui lo a, amaherawhchu keeper Edouard Mendy leh Thiago Silva ten bul an ṭan kawp ṭumin goal an la chhuah lo. Brazilian defender Thiago hi Sevilla nen an inhnehtawk ṭumin a khel bawr a tih nat avangin a dinhmun a chiang lo.

Hei bakah hian tlarhmaah Timo Werner, Kai Havertz, Christian Pulisic, Mason Mount leh Hakim Ziyech-te an awm a, tawnhriat nei ṭha deuh duh pawhin Olivier Giroud pawh a la awm.

Manchester United lamah player thar Edinson Cavani bakah Harry Maguire leh Mason Greenwood te dinhmun a chiang lo a, chhawr theih tak maw?

 Tottenham laka hnawhchhuah Anthony Martial chu hrem vangin la khel thei lo mah se tlarhma player dang an dam kim.

Chelsea tlarhmain fak an hlawh a, thiam pawh an thiam. Timo Werner hian Southampton lakah goal hnih a khung bakah assist a nei a; amaherawhchu German forward hi 'finishing' ah inzir belh tur a la ngah hle.

Blues player-te an la puitling tawk lo niin a lang a, midfield-ah goal ven thiam N'Golo Kante an kawl chungin an tlarhnung a pawp leh ṭhin. Saints lakah inkhel an thunun chungin goal thum ngawt an chhuah a, Lampard-a hote hi season liam ta aṭangin an tlarhnung a  phui lo.

United pawh an famkim bik lo. PSG laka chakna goal khungtu Marcus Rashford-a'n khelmual chhung leh pawnah fak hlawh mah se thutlukna mak tak a la siam fo a, a khelh dan a la puitling lo hle. 

Tlarhnung lamah hming langsar keeper David de Gea leh Maguire-te an inmualpho chhawk a ni ber a, Spurs laka 6-1 zeta an chak loh ṭumah phei chuan player mal ni lo, team pumpui an mualpho. Solskjaer pawhin, "Spurs laka kan mualphona hi Chelsea kan hneh avanga thai bo theih a ni lo a, kan pawm mai a ṭul," tiin a sawi.

Chutih rualin Man United-in league match hnuhnung berah Newcastle 4-1 in an sawp a, Maguire-a'n goal a venhim ṭhat bakah goal a khung. Spurs laka an mualpho hnuah match hnih chak leh tawhin De Gea a khel ṭha ve ve.

United-in match hnuhnung pahnihah Mason Greenwood an telh lo a, sawi zui a hlawh hle. Media lam chuan England tana fehchhuah ṭuma mualpho tawh Greenwood hi training a tlai vangah an ngai a, Solskjaer erawhin a pu hlui Sir Alex Ferguson entawnin a player chhan a pe na hle.

Norwegian manager Solskjaer chuan, "England tana feh chhuahnaa thil thleng avangin media hoin a chanchin ṭha lo lam in hre châk a, in veh reng tih ka hria. In duh zawng erawh sawi tur ka nei lo, training a tlai ngai lo a, training-naah harsatna kan nei lo," tiin Greenwood a chhan a, English rawlthar hian goal hmangin lawmthu sawi ve a ṭul ang.

Manchester United ṭantuten Cavani dinhmun a hre châk a, Uruguayan forward hi manager-in a chhawr duh chuan a khelh theih a beiseiawm.

Porto aṭanga an lakluh Alex Telles erawh PSG nen a inlan tawh a, Chelsea nen inlan nawn se titu an tam khawp ang. French champion an hneh zawhah defender Axel Tuanzebe-a'n fak a hlawh a, United tlarhnungah hian hmun chang zui tak maw?

Midfield-a khel tur pawh rin thiam a la harsa, match hnuhnung pahnihah Paul Pogba leh Donny Van de Beek te bench-ah an awm a; midfielder Fred, Scott Mc Tominay leh Mata-te ho nen lut thei vek an ni a - lut lo vek thei an ni bawk.