Koh zingah Mbappe a tel lo

France manager Didier Deschamps chuan Israel leh Italy nena Nations League khel tur squad a puang a, player koh zingah captain Kylian Mbappe chu telh a ni lo.

Real Madrid forward hi Ocotber thla khan koh zingah a tel lo tawh bawk, an koh loh chhan erawh hliam damkawr a nih vang a ni a, tun ṭumah pawh hian coach Deschamps nena thutlukna hi an siam a ni.

Deschamps chuan, "Kylian hian ram tana inkhelh a duh, mahse a dinhmun leh thil awmdan kan sawi dun a, ama tana ṭha tur angin thutlukna kan siam," tiin a sawi a, mimal harsatna lam a nih loh thu a sawi bawk.

Mbappe hian nipui lai khan Paris Saint Germain chhuahsanin Real Madrid a zawm - Spanish club lian tan hian a duh leh beisei ang boruak erawh a la nei thei rih lo a, hliamin a tlakbuak ve bawk a ni.

Kum 25 mi chauh la ni mah se coach Deschamps-a'n a ringtawk em em a, ram tan pawh match 86 a khelh aṭangin goal 48 a khungsak der tawh a ni.

France squad:

Goalkeepers: Mike Maignan (AC Milan), Brice Samba (Lens), Lucas Chevalier (Lille).

Defenders: Jonathan Clauss (Nice), Lucas Digne (Aston Villa), Wesley Fofana (Chelsea), Theo Hernández (AC Milan), Ibrahima Konaté (Liverpool), Jules Koundé (Barcelona), William Saliba (Arsenal), Dayot Upamecano (Bayern Munich).

Midfielders: Eduardo Camavinga (Real Madrid), Matteo Guendouzi (Lazio), N'Golo Kanté (Al Ittihad), Manu Koné (Roma), Adrien Rabiot (Marseille), Warren Zaïre-Emery (Paris Saint-Germain).

Forwards: Bradley Barcola (PSG), Ousmane Dembélé (PSG), Randal Kolo Muani (PSG), Christopher Nkunku (Chelsea), Michael Olise (Bayern Munich), Marcus Thuram (Inter Milan).