MotoGP hmawrbawkna tur an sawn

Spain ramah tuilian avangin buaina a thleng mek a, hei hian MotoGP 2024 intlansiak hnuhnung ber pawh a nghawng a, ruahmansa chu tihdanglam a ni.

A tira ruahman dan chuan inelna hi Valencia-ah neih tur a ni a, mahse a theih dawn loh avangin Barcelona lamah an tlan zawk ang - tuilian avang hian mi 200 chuangin nunna an chan tawh nia sawi
a ni.

Intlansiak hi November 15-17 chhunga neih tura tih a ni a, a hun hi chu tihdanglam a ni dawn lo - Spain ramah ruah sur nasa vangin tui a lian a, hmun tam tak a nghawng laiin Barcelona erawhin infiamna lam a la thleng zui thei thung.

MotoGP thuneitu lam chuan thuchhuah siamin, “Barcelona lama intlansiak nei zawk turin rawtna kan dawng a, tun dinhmun thlir chuan hei hi kan tana thil ṭha ber a ni.

“Intlansiak tur chauh ni loin a hmuna en tur fans kan ngaihtuah a ngai, tlankawng awmna leh a panna thu hlaah pawh a remchang ber tura ngaih a ni bawk.” an ti.

Kumin May thla khan Circuit de Barcelona-Catalunya hian intlansiak a lo thleng tawh bawk a, tun season chhungin round 6 bakah a hnuhnung ber a thleng dawn tihna a ni ang.

Rider championship lamah Jorge Martin chuan hma a hruai mek. Spanish tlangval, Ducati bike khalhtu ni bawk hian champion lai Francesco Bagnaia lakah point 24-in hma a hruai fal mek a ni.

Kum 26 mi Martin hian season hmasa khan pahnihna ni chungin a hun tawp a hmang a, kuminah chuan chungnung ber ni turin a dinhmun a ṭha rih hle, a elpui Bagnaia hi 2022 leh 2023 champion a ni thung.

Bagnaia tan hnehna chan ringawt a tawk zo tawh lo a, a elpui chetsual a chan tel a ngai tawh - Bike intlansiakna sang leh ngaihhlut berah hian Marc Marquez (2019) hnuah a zawna vawi thum champion thei an la awm leh rih lo a ni.

MotoGP World Championship Standings

Pos Rider Ram Team Points

1 Jorge Martin SPA Pramac Ducati 485

2 Francesco Bagnaia ITA Ducati Lenovo 461

3 Marc Marquez SPA Gresini Ducati 369

4 Enea Bastianini ITA Ducati Lenovo 368

5 Pedro Acosta SPA Red Bull GASGAS 209

6 Brad Binder RSA Red Bull KTM 206

7 Maverick Viñales SPA Aprilia Racing 189

8 Fabio di Giannantonio ITA VR46 Ducati 165

9 Franco Morbidelli ITA Pramac Ducati 161

10 Alex Marquez SPA Gresini Ducati 155

11 Aleix Espargaro SPA Aprilia Racing 146

12 Marco Bezzecchi ITA VR46 Ducati 144

13 Fabio Quartararo FRA Monster Yamaha 108

14 Jack Miller AUS Red Bull KTM 84

15 Miguel Oliveira POR Trackhouse Aprilia 71