Sinner leh Alcaraz an dah hrang

Jannik Sinner leh Carlos Alcaraz ten tun season chhunga Grand Slam pali chu pahnih ve vein an in lak sem a, season kharna tur ATP Finals khelh turah player pahnih hi group hranah dah an ni.

Pathianni zan aṭangin Turin, Italy-ah ATP Finals an khel ṭan dawn, world number 1 Sinner hi Ilie Nastase Group-ah Daniil Medvedev, Taylor Fritz leh Alex de Minaur te nen an awmkhawm.

Wimbledon leh French Open 2024 champion Alcaraz chu Alexander Zverev, Casper Ruud leh Andrey Rublev te nen John Newcombe Group-ah an awmkhawm thung a ni, a hmuhnawm dawn.

Ilie Nastase Group:

1 Jannik Sinner Italy

2 Daniil Medvedev Russia

3 Taylor Fritz USA

4 Alex de Minaur Australia

John Newcombe Group:

1 Alexander Zverev Germany

2 Carlos Alcaraz Spain

3 Casper Ruud Norway

4 Andrey Rublev Russia

Group pahniha player palite hi vawi khat ṭheuh an inkhel kual vek dawn a, chumi hnua a sang pahnihten semifinal lutin final an khel zui leh ang, semifinal aṭang chuan knockout a ni ang.

Season hmasa ATP Finals-ah khan Novak Djokovic a champion, kuminah chuan Serbian star hi hliam vangin a inlan thei dawn lo a, tun hnai khan a inhnukdawk - a hmun ruakah midang pakhat a inlan theih phah a ni.

Djokovic hian kuminah Grand Slam nomawi a chawi miah lo a, season dang angin a hlawhtling tawk lo. Mahse, an ram Serbia tan Paris Olympic neih zawh takah khan gold medal a la, hei vang hian a tan kum ṭha tia sawi theih a ni ang.