Goal surna hmunah Arsenal lut dawn

Pathianni zan inkhawm banah, thingpui sen hang in pahin Premier League inkhel hmuhnawm en tur a awm leh dawn–Chelsea chuan Arsenal an lo mikhual dawn. London Derby hi ṭhianhoa en a nuam ang, mahni chauh a en pawhin a hmuhnawm tho ang.

Stamford Bridge hi tun hnaia goal surna hmun a ni, mualneitu Chelsea hian an match hnuhnung berah goal riat ngawt an khung – goal surna hmunah Arsenal an lut dawn a ni a, mahni tawka tlarhnung nei khawng ve tak nen an insu tur hi a hmuhnawm lo thei lo.

Goal sur tir thei Blues

Match hautak khel tur chuan hahdam leh hautak lo deuh zawka inbuatsaihna hun thawl neih a duhawmin a rinawm, chutihrualin khelmual chhungah ngei mai ṭha taka inkhelh chu Arsenal tum tura inbuatsaih nan a ṭhat zawk a rinawm.

Ningani zanah Chelsea hian an player ṭha ṭhenkhat tel loin UEFA Conference League–League Stage an khel a, an khingpui Armenian club Noah FC chi 8-0 tehmeuhin an sawp–Gunners tan hriat nuam a ni lo ang.

Stamford Bridge-a inkhelah Blues tan Joao Felix leh Christopher Nkunku ten goal hnih ve ve an khung a, anni pahnih bakah hian Tosin Adarabioyo, Marc Guiu, Axel Disasi leh Mykhailo Mudryk ten goal khat ṭheuh an khung a ni.

Goal khung lo mah se Enzo Fernandez a langsar–Argentine midfielder hian Adarabioyo, Disasi leh Felix-a goal khung tur a siamsak a, hattrick assist a nei hial–Blues hian goal an sur tir, hei mah mah Cole Palmer a la tel lo.

Enzo Maresca-a'n Arsenal lakah chuan a neih ṭhat ho a hmang leh tawh dawn a, an boruak fuh lai tak a nih avangin an tawrhhlehawm khawp ang–Palmer leh Nicolas Jackson ten goal an nawr leh ngei ang, a hmuhnawm dawn.

Odegaard a dam

An in beisei angin Arsenal hian season bul an ṭan lo. Nipui bazar laia an dah san loh Chelsea nen tunah chuan an point hmuh zat a inang a, goal difference an la nei chhe zawk zui! Mikel Arteta naute hian club dang hi an tehsual deuh a ni mai thei.

Goal khung an harsat a, tlarhma laiah Kai Havertz dah ṭhin niin a khung tam tawk lo–goal khung an harsat chhan hrang hrang zingah Martin Odegaard inhliam hi a langsar a ni ang, tunah chuan Gunners captain hi inkhel turin a inpeih leh tawh.

Norway international midfielder Odegaard awm loh laiin an goal nawr a na tawk lo a, a bik takin an khingpui lam goal bul hnaia ball hlauhawm pek chhuah an harsat, tunah chuan an buaina pakhat hi a fel chho leh thei tawh tura beisei a ni.

Declan Rice erawh nimin tlai thleng khan a dinhmun a chiang lo, England international midfielder hi hliam vangin Champions League-ah a inlan lo–Italy ramah zin ve lo mah se hliam na tak chu a ni lo niin an sawi a, a dinhmun tak erawh a chiang lo thung.

Gabriel leh William Saliba bakah Ben White a dam ṭha tawh a, a sir lehlamah Jurrien Timber a awm thei bawk–Arsenal tlarhnung khawng tak kan hmuh theih a rinawm a, goal khung tura inthlahrung ngai lo Palmer leh a ṭhiante hmaah fiahna an hmachhawn dawn a ni.

Zanin inkhel tur

Brentford 08:30 PM AFC Bournemouth

Crystal Palace 08:30 PM Fulham

West Ham United 08:30 PM Everton

Wolves 08:30 PM Southampton

Brighton & Hove 11:00 PM Manchester City

Liverpool 01:30 AM Aston Villa

November 10, Pathianni

Manchester United 07:30 PM Leicester City

Nottingham Forest 07:30 PM Newcastle United

Tottenham Hotspur 07:30 PM Ipswich Town

Chelsea 10:00 PM Arsenal

Team Dinhmun

# Team Pld W D L GF GA GD Pts

1 Liverpool 10 8 1 1 19 6 13 25

2 Manchester City 10 7 2 1 21 11 10 23

3 Nottingham Forest 10 5 4 1 14 7 7 19

4 Chelsea 10 5 3 2 20 12 8 18

5 Arsenal 10 5 3 2 17 11 6 18

6 Aston Villa 10 5 3 2 17 15 2 18

7 Tottenham Hotspur 10 5 1 4 22 11 11 16

8 Brighton & Hove 10 4 4 2 17 14 3 16

9 Fulham 10 4 3 3 14 13 1 15

10 AFC Bournemouth 10 4 3 3 13 12 1 15

11 Newcastle United 10 4 3 3 10 10 0 15

12 Brentford 10 4 1 5 19 20 -1 13

13 Manchester United 10 3 3 4 9 12 -3 12

14 West Ham United 10 3 2 5 13 19 -6 11

15 Leicester City 10 2 4 4 14 18 -4 10

16 Everton 10 2 3 5 10 17 -7 9

17 Crystal Palace 10 1 4 5 8 13 -5 7

18 Ipswich Town 10 0 5 5 10 21 -11 5

19 Southampton 10 1 1 8 7 19 -12 4

20 Wolves 10 0 3 7 14 27 -13 3