Solskjaer vs Lampard

Manchester United leh Chelsea enkawltu Ole Gunnar Solskjaer leh Frank Lampard te hi club legend ve ve an ni a, club kalphung pawh an hre chiang. 

Nikum khan Man United leh Blues hi vawi li zet an inhmachhawn a, Solskjaer hote hian Premier League-ah vawi hnih hnehin Old Trafford-ah phei chuan 4-0 in an chak. 

Man United-in league match hnihah an chak ve ve avangin Premier League-ah pathumna an nih theih phah a, Chelsea erawh palinaah an awm.

Lampard hote hian League Cup-ah pawh Man United hi an hneh lo a, amaherawhchu an intawn hnuhnun ber FA Cup-ah 3-1 in phuba an la. 

Chelsea-in Lampard chungah rinna nghat ngamin tun nipui transfer-a player lakluh nan ringawt pound maktaduai 200 chuang an thehchhuahsak a, Solskjaer erawh United thuneituten a player duh ber Jadon Sancho an laksak thei lo.

Chutihrualin club pahnih hian champion an elphak lo a nih pawhin season hmasa anga pakhatna leh pahnihna nen an inkar a zau lutuk a nih chuan ban theih dinhmunah an ding ang.