Mizoram rawltharten Arunachal Pradesh hneh

Board of Control for Cricket in India (BCCI) hnuaia mipa kum 19 hnuai lam inelna–Cooch Behar Trophy khelh laiah Mizoram Men's Under – 19 Team te’n Arunachal Pradesh chu wicket riatin an hneha, ni li khelh turah a ni thumna thawh khatnaah Mizoram team te hi an chak fel der a ni.

Inelna hi GS Patel Stadium, Nadiad, Gujarat-ah khelh a niin, Arunachal Pradesh hian thawk hmasain thawh khatna (1st innings) ah run 181 siamin an out vek a, he innings-ah hian Ramhlun Venglai rawlthar Johan Lalbiakkima'n wicket sarih a la.

Mizoram lamin thawh khatna bat vein run 92-ah an out vek a, hetah hian wicket keeper, Zemabawk tleirawl, CAM Emerging Player of the Year ni lai Lalramluahpuia Zote chuan run siam hnem berin run 45 a siam.

Mizoram hi thawh hnihna (2nd innings) ah hian an che ṭha hle a, Arunachal hi run 112-ah an vawm out vek. CAM Junior Cricketer of the Year nilai Johana bawk che ṭha leh berin wicket ruk a la a, Johana hian a vaiin wicket 13 lai a la a ni.

Arunachal Pradesh target siam–run 202 hi Mizoram chuan umin, over 71.4-ah batsman pahnih chauh hloh chungin target hi awlsam takin an umpha a, nuamsa takin hnehna an chang.

Mizoram tan hian Lalhlimpuia, Ainawn Veng chuan century (run 112*) siamin a che ṭha hle. Hlimpuia hian ball 218 a hmachhawn aṭangin run 112 lai a siam a, a tawp thlenga damin team chak nan hian a thawhhlawk takzet a ni. Ani bakah hian Ramthar Veng rawlthar F Lalnunkima chuan run 58 siamin a thawhhlawk hle bawk.

Tournament-ah hian Mizoramin match nga an khel dawn a, an match pahnihna atan November 13, Nilaini aṭangin Tripura nen an inkhel leh ang.

Cricket Association of Mizoram chuan thuchhuah siamin, Mizoram Men’s Under 19 Team player leh supporting staff te chu a lawmpuiin a chhuang takzet tih an sawi a, an khelh leh zel turah pawh duhsakna sang ber an hlan a ni.