Man City tan fiahna

Pep Guardiola enkawl Manchester City hi hneh theih loh ang maia vawk lal len ṭhin an ni a, mahse tun hnaiah erawh an chak hleithei lo thung - zanin dar 11:00 hian Brighton khelmualah an lut ang.

Tottenham Hotspur hneh loin League Cup aṭangin an tla a, chumi hnuah Premier League khelin Bournemouth mualah an tlawm - Champions League lamah Sporting Lisbon an ngam lo zo leh chiah.

Guardiola naute hi an tlarhnung a phui lo, hei hi an buaina langsar a ni. Sporting lakah an defender ṭha chhawr theih an nei mumal lo, zaniah pawh Ruben Dias leh John Stones te an la dam loh avangin an fimkhur a ngai ang.

Man City tana chanchin lawmawm erawh Kevin de Bruyne a dam ta hi a ni. Belgian midfielder hi Sporting lamah hun rei vak lo a inlan thei tawh a, tunah chuan a bul ṭantu zingah pawh a tel theih tawh a rinawm.

De Bruyne a dam chuan striker Erling Haaland tan pawh chanchin lawmawm a ni ang - Norway international Haaland leh De Bruyne te hi an inman em em a, chutihrualin tun season bikah an la khel dun tam lo thung.

Tunlai boruak thlir chuan Man City hi chak chiangsaa dah theih an ni bik lo a, an result ṭha lo leh hliamin a tihbuai vel karah hian an tho chhuak thei ang em tih kan hre dawn, an tan chuan fiahna lian tak ni tura ngaih a ni.

Brighton hi zuam chi an ni dawn lo - na taka an khingpuite goal nawr ṭhin an ni a, striker tawnhriat nei ṭha Danny Welbeck chuan tun season EPL match 10 aṭangin goal ruk a khung tawh, tun hma lama goal a la khung theih ngai lohna City lakah khung a tum dawn a ni.