G.I.G Motors Inter Village Football Zaninah Kick off neih a ni dawn

Mizoram Football Association (MFA) buatsaiha neih tur, veng leh khua inelna, G.I.G Motors Inter Village Football Tournament chu zanin dar 8:00 hian Dawrpui Multipurpose Hall, Pipu Tlangah Kick Off neih a ni dawn.

Kick Off Programme-ah hian draw neih nghal tur a ni dawn a, draw hi MFA thawhpui Siruk ten an buaipui ang - team tin aiawh mi pahnih ṭheuh he hunah hian kal tura beisei an ni a, Organising Committee chuan ngai pawimawh turin inelnaa tel tur team-te a ngen.

Champion team-in cheng nuai hnih leh sial an dawnna tur inelnaah hian team 88-in inelna an hmachhawn dawn a, local council team 48, village council team 33 leh Jt VC team pasarihten Mizorama football thiam ber veng/khua nih an inchuh ang.

November 12, Thawhlehni aṭangin Inter Village Football Tournament 2024 hi khelh ṭan tur a ni dawn a, khelmual pathum Rajiv Gandhi Stadium, 1st Bn MAP Ground Armed Veng leh Chite Veng Ground Chite ah te khelh a ni dawn a ni.

G.I.G Motors Chief Executive Officer John Lalpeka'n kick off-na hi a nei dawn - programme hi Zorinpuii Hlondo, Zonet chuan a kaihruai ang a, organising secretary Hmingthansanga hnen aṭangin report ngaihthlak tur a awm bawk ang.