UFC 254: Khabib vs Gaethje a hmuhnawm dawn

Mixed Martial Arts ngainatute tan zaninah fight hmuhnawm en tur a awm dawn a, UFC 254-ah tlawm la nei loKhabib Nurmagomedov leh fighter boruak lian Justin Gaethje-te chu an inhnek dawn. 

Abu Dhabi-a fight neih tur hi main card chu zan dar 11:30 aṭangin en ṭan theih a ni dawn a, preliminary card chu zan dar 9:30-ah ṭan tur niin prelims bik hi India-ah en theih a ni dawn lo. 

UFC Lightweight Championship inchuha fighter rothap pahnih inhnek tur hi Sony TEN 1, Sony TEN 2 (English) leh Sony TEN 3 (Hindi)-ah te en theih a ni a, phone hmanga en duh tan Sony LIV app lamah a en theih ang. 

Kum 32 mi fighter hian inhnek vawi 28-a hmachhawn tawhah vawi 28 hnehna a chang thei a, heng zinga pariat ngawt chu a knockout - a hneh zingah Dustin Poirier, Conor McGregor leh Al Iaquinta-te hming a intlar avangin dah hniam theih a ni lo. 

UFC lightweight kawnghren a kawl mek a, he title hi Poirier leh McGregor lakah a humhim tawh avangin Gaethje laka chan chu a duh lo ang tih a chiang. 

Russian fighter chuan, "Hnathawh tur zawng zawng chu kan thawk zo tawh a, tunah chuan rilru lam inbuatsaih a ngai tawh thung. Rilru paukhauh a ngai a, phur lutuk chi pawh a ni chuang lo," a ti a, fimkhur a pawimawh thu a sawi. 

Kum 31 mi Gaethje hian vawi 24 fight-a hmachhawn tawhah vawi 22 hnehna a chang a, vawi hnih a tlawm - a tlawm hmasak berah Eddie Alvarez a ngam lo a, Khabib-a hneh hnu Poirier a ngam lo tawh bawk. 

Mahse, Gaethje hian Khabib hmachhawn thei tur hian UFC 249-ah khan fighter ṭha     Tony Ferguson chu technical knockout hmangin a hneh tih hriat a ṭha a, a ke a hman thiam bawk avangin Khabib tan fimkhur a finthlak ang. 

Khabib-a coach Javier Mendez chuan, "Justin-a'n hnuai lama a ke a hman thiam dan hi sawi tham a tling a, tupawh pet thlu thei turin theihna a nei - MMA-ah chuan ani aia kick ṭha zawk an awmin ka hre lo," a ti a, fimkhur an tum. 

American fighter Gaethje hian Khabib-a hmachhawn avang hian pound maktaduai 2.5 vel a hlawh dawn a, a chhungkaw tan theihtawp chhuah a tum. 

Gaethje chuan, "Ram pawnah thlawhtheihna hmangin ka chhungte an la zin ngai lo a, business class-ah phei chuan an la chuang ngai lo. Ka pa hi dar laihchhuahna hmunah kum 37 vel a thawk a, kum khat liam ta velah khan a chawl. 

"Ka nu pawh he fight ka hmachhawn zawhah chuan hahdam takin a hna aṭangin a chawl ve tawh ang. Chu chu a thlen ngei theihna turin dar an vuak rik rualin ka ṭang dawn a ni," a ti a, Khabib hneh ngei a tum.