Inter Village Football kick off a ni ta; Cheng nuai hnih leh sial inchuh tur team 88 inlan dawn

G.I.G Motors Inter Village Football Tournament chu Inrinni zan khan Dawrpui Multipurpose Hall-ah G.I.G Motors Chief Executive Officer John Lalpeka'n a kick off a, team inel tur 88-te awmna tur group leh inhmachhawn dan tur 'draw' neih nghal a ni.

Mizoram Football Association (MFA) buatsaiha neih tur, veng leh khua inelna hi November 12, Thawhlehni hian khelh ṭan tur a ni dawn a, khelmual pathum Rajiv Gandhi Stadium, 1st Bn MAP Ground Armed Veng leh Chite Veng Ground-ah te inelna neih ṭhin a ni ang.

Sial inchuhna

Mizoram pum huapa football thiam veng/khua zawnna inkhelah hian lawmman pawh a theuneu dawn lo - pakhatnain cheng nuai hnih an dawn dawn bakah sial an dawng tel dawn a, lawmman hlu tak hlawhchhuah tumin footballer ṭha tak takten khelmual an lut dawn.

Tun inelnaah hian team 88-in inelna an hmachhawn dawn a, local council aṭanga team 48 telin, village council lam hian team 33 an thawh a, Jt VC angin team pasarihin inelna hmachhawn an tum bawk - Mizorama football thiam ber veng/khua nih an inchuh ang.

Ngaihven hlawh

Group A-ah Lengpui, Chhinga Veng, Siphir Venghlun leh Bethlehem Vengthlang te an awm ho a, he group aṭanga Chhinga Veng leh Durtlang Leitan inhmachhawn turte hi first round-a inkhel en châkawm zingah a rin luh theih der tawh.

First round-ah Repulic chu group B-ah an 'bye' a, he group-a team langsar tia sawi theih zingah Tlangnuam, Bairabi Jt VC leh Ramhlun South an awm a, chutih zawng chuan thil harsa tak tur niin a lang lo.

Kha raw le...

Dinthar leh Tuirial inkhela chak zawk Salem Vengin round of 64-a an lo nghak veng veng turte hi inkhel tingaihnawmtu a tling a, Ramthar Veng leh Armed Veng intawng tur mawlh hi - local fooball ngainatu tan chuan tun inelna en tichâkawmtu a tling pha hial ang.

Group C-ah Chanmari awmin, an match hmasa berah Samtlang an hmachhawn nghal dawn a, Mizoram Premier League club nei kumhlun veng hian champion loh chu an mitthla lo ang tih a chiang e.

A thiam awmna?

Group E-ah Luangmual, Bethlehem leh Zemabawk North te ho an awm a, he group hi a hmuhnawm dawn tih a chiang nghal thei - group G lama Armed Veng South, Chawnpui leh Durtlang awm hote pawh inelna tingaihnawmtu a ni.

Joint VC anga tel team an awm nual avangin hei pawh hi inelna tihlutu a tih loh theih dawn loh - tuin nge sial leh nuai hnih hlawh ang? Hunin a hril thuai dawn e.