A chung berah thlamuangin Liverpool

Manchester City-in 2-1 in Brighton & Hove Albion an ngam lo tih hre chungin Liverpool an inlan a, Inrinni zan khan Premier League inkhelah Aston Villa chu 2-0 in an hneh.

Reds tan Darwin Nunez leh Mohamed Salah ten goal khat ve ve an khung a, Villa-in a chhanletna tur an nei lo - Unai Emery hoa mangrama leng ṭhin team hian a tak ram an tem chho ṭan mek.

Reds-in hnehna an chan avangin pahnihna Manchester City chu point nga ngawtin an tlanpel a, coach thar avanga beiseina nei sang lo club ṭantute khan tunah chuan beiseina thar an nei ve leh ta.

Liverpool hian league match 11 an khelh aṭangin point nga ngawtin City hi an tlasan ta a, nizan Chelsea leh Arsenal inkhel pawhin table chung bera Arne Slot leh a naute dinhmun a sawi danglam phak lo. A chung ber chu Liverpool awmna tura duan a ni e.

Nunez-a hun

Liverpool-in tlarhmaah duhthlan tur an ngah thu kan sawi fo a, a taka hmuhtirin kan awm leh ta - Anfield-ah Reds-in fans puihna nen Villa an nawr a, mikhual team lakah chak loh an tum lo tih a chiang.

Minute 20-naah Darwin Nunez a inlar a, Uruguayan striker hian chance pek tam a nih chuan goal khung turin theihna a nei tih a pholang - Anfield chu hlim takin an zai a, City tlawm thu hre sa an ni bawk a, fans thawm chu ring tak a ni.

Nunez-a goal hmahruai khung hi Salah thawhchhuah a ni - Egyptian forward hi fal taka a ball um lut chu Leon Bailey -a'n a titlu a, heta ṭanga ball per chu Nunez hian um lutin goal-ah a chantir.

Uruguay international hian goal dang khung theihna hun ṭha pawh a nei a, mahse, a hun ṭha neih a chhawr lo - hnai set saw aṭangina thlawh over a, thlirkir changa ui vawg vawng tur chi a ni!

Chhandamtu Salah

Liverpool chak thu ziah leh inkalsan thei lo a awm a, chu chu Salah goal khung thu hi a ni - hun tawp nan minute ruk chauh a awm tawh tihah a khung belh a, kum 32 mi forward hian a la tar lo tih Liverpool thuneitute a hriat nawn tir.

Season tawp ruala contract hmang zo tawh mai tur Salah hian tun thlengin Anfield-ah contract thar a la ziak lo a, amah hi chuan cham a hnial lo niin a sawi - sum inrenchem tak Reds hian kum 35 hnaih tawh hnena hlawh tam tham tak la pek an inzuam leh zuam lohah a innghat a ni ber.

Salah hian tun season inelna hrang hrangah match 17 khelin goal 20 a thawk chuak leh der tawh a, goal 10 ngawt khungin assist vawi 10 a nei tawh bawk - league match li chu a zawnin goal a khung ta bawk.

'One season wonder' tia ringhleltu tam takin an thlir Salah hian a season riatna Anfield-ah a hmang ve der tawh a, Merseyside club tan hian inelna hrang hrangah match 365 khela goal 220 khungin, assist vawi kua a nei.

Aw Villa...

Aston Villa beisei angin season a kal zui lo chiang ta hle - Liverpool laka an tlawm chiah hian inelna hrang hrangah match li a zawnin an tlawm tihna a ni a, Emery leh a nauten ṭan an lak thar leh a ngai.

Villa hian an league match hmasa pangaah khan vawi li hnehna changin, vawi khat chiah an tlawm a, tunah league match ruk khel leh tawhin, vawi khat chiah an la chak - a ṭha tawk lo.

Anfield-ah Villa hi an khel chhe hrim hrim a ni hran lo a, chance pawh an nei ve ngei. Mahse, world class player leh team ṭha taka player pangngai danglamna a lang a, Liverpool-in kil tinah game thlak danglam thei player an nei a, Villa tan erawh a harsa!

Hetihrual hian November fixture a hautak avanga mi tam takin rinhlelhna mitmeng nena an thlir Reds hian international break chu table chung ber luah chungin an hmang ta phawt a, season tawp thlengin tawlh hnun tawh loh an tum ang!