Sikkim lakah Mizoram chak

Board of Control for Cricket in India (BCCI) hnuaia Under – 23 mipa cricket inelna Col CK Nayudu Trophy khelh mekah Mizoram chuan Sikkim chu an tualzawlah an luhchhuah a, wicket rukin an hneh.

Tournament hi ni khat aia rei khelh chi (multi days format) niin, ni li khelh turah Mizoram hian awlsam takin a ni thumnaah hnehna an chang thei a ni.

Sikkim lam hian bat hmasain thawh khatna (1st innings) ah run 180 siamin an thi (out) vek, Prem Kumar Layak, Ainawn Veng chuan wicket li lain a khel ṭhla hle. Mizoram lamin bat vein, a thawh khatnaah hian run 183 an siam a, Ṭhuampui player Sahil Sharma chuan ball 121 a hmachhawnah run 74 a siam.

Thawh hnihna (2nd innings) ah Mizoram bowler-te an che ṭha. Sikkim hian run 104 bak an siam hman lo, an vawm out vek. Ramhlun Venglai rawlthar K. Vanrotlinga chuan wicket thum a la.

Sikkim hian target atan run 102 an siam tihna a ni a, target hi Mizoram lamin mi pali chauh hloh in over 26.2 lekah an umphak a, wicket ruk in hnehna an chang a ni.

Innings-ah hian openner pahnih Albert Ramthanpuia, Ramhlun Venglai (run 41) leh Vanlalpekhlua, Zemabawk (run 19) ten run an siam hnem a, awlsam zawkin Mizoram an chak theih phah.

Mizoram hian vawi nga khelh turah vawi li khel tawhin, match hnuhnung ber tur hi November 15 hian Arunachal Pradesh nen Ahmedabad ah an khel leh ang.