A thiam zinga thiam ber Coco Gauff

Hmelchhe tennis thiam zual pariat inelna - WTA Finals 2024 khelh zawh a ni a, a ṭha zual ho zingah Coco Gauff a thiam ber, American star hian Zheng Qinwen hnehin nomawi a chawi.

Inrinni zan khan Riyadh, Saudi Arabia ramah a hmawr bawkna neih niin, inkhel hmuhnawm leh inhnehtawk takah Gauff hian set hloh hmasa mah se 3-6, 6-4, 7-6 (7-2) in a chak a, hnehna chang tur hian darkar thum chuang hun a hmang.

American player Gauff hi kum 20 mi chauh a la ni a, player ropui Maria Sharapova hnua WTA Finals champion leh thei naupang ber niin - Serena Williams hnung zuiin American nula zinga champion leh thei a ni ta chiah bawk.

US Open pawh champion tawh Gauff chhuan, “Saudi Arabia ramah inelna pangngai ka khelh vawi khatna a ni a, ka tan chuan a hluin a ropui takzet. Ka theihnghilh tawh ngai dawn lo a ni.

“Inkhel ropui tak a ni a, champion tur chuan tihsual neih tam a rem lo tih pawh ka hria. A ṭha thei ang bera khelh chhuah kha ka tum ber a ni tawp mai a, keimah aṭanga a ṭha ber chu ka khel chhuak,” tiin a khelh danah a lungawi hle tih a sawi chhuak.

Nomawi a chawina kalkawng hi a awlsam lo, group match lamah champion lai Iga Swiatek a hneh a, semifinal-ah champion tura rinkai leh buk rit Aryna Sabalenka a hneh leh bawk, ranking sang pahnih hnehin final a lut a, a tawpah Olympic champion a hneh zui leh bawk.

Tun season chhungin Gauff hian Grand Slam pali zingah final luhna a nei miah lo, Australian Open leh Roland Garros semifinal a lut a, a dangah chuan a thiam pali zingah pawh a tel phak lo.

Wimbledon leh US Open bikah chuan fourth round paltlang loin a tla a, season hmasa lama major title a lak a belhchhah lo - mahse ATP Finals champion a nih avangin atan kum ṭha tia chhiar theih a ni ang.

Gauff leh Zheng te hi an intawn vawi hnihna a ni a, kumin tir lam khan Rome Open-ah inkhel in Gauff bawk hi straight set hmangin a chak, tun ṭumah erawh Chinese nula Zheng hian nasa takin hma a lo sawn tawh a, awlsam taka paltlang theih a ni tawh lo.

Seeded pasarihna Zheng hi chak lo mah se atan kum chhinchhiah tlak a ni ve bawk. Tun season chhungin Australian Open final a lut a, nomawi inchuhnaah Sabalenka a ngam lo. Mahse, nipui lai khan China tan Paris Olympic gold medal a vaw chhuak.

China hian Olympic gold medal an la tam ṭhin, mahse tennis huangah chuan gold medal an lak hmasak ber a nih miau avangin an ngaihlu hle.

Palermo Ladies Open nomawi a kawl lai a humhim a, hei bakah hian Pan Pacific Open champion niin WTA Finals hial a khel phak, a tan kum ṭha tia sawi loh theih loh a ni.

Chinese nula Zheng chuan, “Inkhela chak lo zawk nih chu a na, a bik takin final-a chak loh chu a hrehawm. Mahse, lungngai a indawm kun mai loin hmalam kan thlir tur a ni,” a ti. Season tharah ropui leh ṭha zawka inlan ngei a tum ang.