Man City an chak lo leh tawh!

Pep Guardiola leh Manchester City tan meuh pawh tun season chu a harsa dawn - Premier League nomawi an kawl lai humhim tur chuan insiamṭhat an mamawh nasa hle tih a takin a lang.

Man City hian Inrinni zan khan Brighton lakah Erling Haaland-a goal khat hmangin hma an hruai, ni dang ang chu ni se khung belh emaw venhim kha an tan thil harsa a ni lo, mahse tunlai chu an tan thil harsa a ni tlat.

Brighton hian second half-ah Joao Pedro hmangin an sut a, hun tawp dawnah Matt O'Riley chuan 2-1 a chakna goal a khung zui leh bawk, tunlai Man City boruak hi Guardiola tan meuh pawh buaina tham a ni ta.

Tun hnai an match hnuhnung paliah Man City hian chak ni hmel an hmu lo a ni satliah lo, an tlawm vek! EPL hmahruaitu Liverpool an phak lohna chu point nga a ni ta, thlasik boruak vawt chu a chung ber aṭangin an hmang dawn lo niin a lang.

Man City manager Guardiola chuan, "A zawnin match li kan chak lo, he thil kaltluang lai ṭha lo tak hi kan tih tawp a ngai a, boruak siam danglam turin mawhphurhna ka nei, hlen chhuah pawh ka tum ang.

"Premier League season hnuhnung pasarihah vawi ruk kan champion a, kumin chu midang champion hun a ni tawh tihna pawh a ni mai thei," a ti a, an chunga awm Reds chu match hnih lek a umphak theih la ni mah se boruak rit a insiam duh lo.