Bayern chakna Musiala

Jamal Musiala-a goal khat khung hmangin Bayern Munich chuan St. Pauli chu 1-0 in an hneh a, German rama football inelna sang berah Bavarians hian anmahni hnaih bertu RB Leipzig aiin point ngain an hmu tam.

Pauli hi team lian leh langsar an ni lo, an khelmual Millerntor-Stadion-ah pawh entu 29,546 chauh an pungkhawm - Bayern Munich khelmual nena khaikhin chuan a te hle, mahse an ṭang thei viau thung.

German international hian yard 30 vela hlaah ball a chang a, player tam zawk tan chuan goal khung nan a la hla lutuk. Mahse, mi bik Musiala hian a duhna takah a khung emawni tih mai tur a ni a, minute 22-naah goal awmchhun hi a khung a ni.

Bavarians tan Harry Kane chuan ni dang angin goal a khung lo, mahse a lansarh loh zanah Musiala chu an damna a ni. England captain hian nomawi chawi duhin Bayern Munich a zawm a, season khatnaah chuan engah mah an champion lo.

Vincent Kompany kaihhruaina hnuaiah hma an sawn ta hret a, tun season chu an chesual viau a nih loh chuan Bundesliga title la turin an dinhmun a ṭha, chutihrualin hmabak kawng zawh tur erawh an nei thui hle.