Real hlim zan hliah khuhtu chu player inhliam!

Match hnih ngawt a zawna goal thum aia tam chhuaha an tlawm hnuin Real Madrid an tho ve leh ta a, Inrinni zan khan La Liga match-ah an mikhual Osasuna chu 4-0 ngawtin an sawp - nizan khan Barcelona-in Real Sociedad hmachhawnin an result kan hre hman lo.

Real Madrid tan Ballon d'Or dawn loh vanga titau Vinicius Jr chuan titau ngam tur a ni tih pholangin hattrick a siam a, hetihlai hian tun season-a goal khung harsat tak Jude Bellingham chuan goal khat a khung bawk.

Hetihlai hian Real a pan hnua beisei phak lo Kylian Mbappé-a'n goal a khung lo chhunzawm zel a, La Liga-ah match 11 khelin goal ruk chiah a la khung - a theihna, thiamna leh hlawh thlirin a ṭha tawk lo!

Hetihlai hian Real tan goal li ngawt an khung zanah pawh lawm lohna tur a awm a, hliam vangin defender Eder Militao chu lakchhuah a ngai a, Rodrygo leh Lucas Vazquez te pawh hliam vang thoin an chhuah a ngai.

Vini = hattrick

Barcelona laka 4-0 a an tlawm hnuah, 4-1 in AC Milan an ngam lo zui a, hei vang hian tam takin Vinicius Jr-a Ballon d'Or beiseina pawh an nuihzat a, game harsaa team tana ding chhuak lo tiin an deu.

Mahse, Brazilian forward hi club dinhmun chhiat lai takin a inlar a, Osasuna lakah hattrick a siam - minute 34-naah Vinicius hian goal a khung ṭan a, second half-ah goal hnih a khung leh bawk.

Vini goal hmasa ber hi Jude Bellingham siamsak a ni a, minute 61-naah Raúl Asencio chuan ball ṭha zet pein, an goal hnihna a khung bawk - minute riat hnuah Vini hian keeper Andriy Lunin siamsak chu hattrick siam nan a khung zui.

Real chhuanvawr Vini hian tun season inelna hrang hrangah match 17 khelin goal 12 a khung tawh a, assist vawi sarih a nei bawk - kum 24 mi forward hian season hmasa a chet ṭhat a chhunzawm zel.

Hey Jude

Season hmasa lawkah Real-in hahipin Jude Bellingham chanchin an sawi a, pound maktaduai 100 man chuang ni chunga, khati taka 'pressure' a zo kha mi tam tak mak tih a tling - goal 23 tehmeuh a khung.

Mahse, season thar a herchhuah meuh chuan Jude a talbuai a, Ballon d'Or pathumna hian goal khung a harsat. Season hmasaa a goal khung zat chu khung a harsa tawh mai thei a, mahse, rei tak a 'awl' hi tam takin an ring lo.

A lo lan leh meuh chuan Bellingham-a'n tun season-a Real tana a goal hmasa ber a khung a, English midfielder hi a thaw huai ngei ang - inrintawkna a nei sawt dawn tih a chiang.

Vini leh Jude an 'form' leh ṭan a, hetihlai hian Kylian Mbappé erawhin beisei a la phak lo. Real-in an mikhual Osasuna an hneh a, Carlo Ancelotti nauten infuih phur nan an hmang ang.

Hliam chu

Real-in player inhliam an neih belh nual a, coach Ancelotti nuih a za lo. Minute 30-na lekah hliam vangin Militao lakchhuah a ngai a, Asencio chuan a thlak - ACL (khup hliam) a nih avangin a chawlh rei a rinawm.

Rodrygo pawh minute 20-naah hliam vang thoin lakchhuah a ngai a, chawlhlawk hman hnuah Lucas Vazquez chu hliam vangin a lut chhunzawm thei lo bawk - point thum hlawh zanah Real tan lawm lohna tur a tam hle.

Real boss Ancelotti chuan, "First half chhunga player pathum inhliam neih mai chu mak tak a ni - kan match inhnaih hlawm lutuk hian player tan chawlh hahdam leh nuam ti taka inkhelhna hun a siamsak lo a ni.

"Hetiang chuan inhliamna chance a sang bik a, hei hi thil nih phung a ni a, keimahni tan chauha sawi ka ni lo," a ti a, an fixture chep lutuk chu sawisel pahin, thiam takin team dangte chu an lungawi lohnaa thlawp turin a sawm.

Damdawi in!

Real-in Inrinni zan inkhelah player inhliam pathum an neih belh a, player inhliam sate nen chuan Madrid khaw club hi tun dinhmunah chuan damdawi in tenau ang mai an ni - Ancelotti sawi angin match tam lutuk chu an tuar niin a lang.

Spanish champion hian tun hnai ni 21 chhungin match nga an khel hman a, hetih chhung hian Germany leh Spain-ah te an inkhel kual hman - Valencia tuilian vangin match khat an khelh tur an sawn tlai mah mah.

Real hian hliam vangin centre-back David Alaba an la chhawr thei lo mek a, right back Dani Carvajal pawh ACL vang thoa chawl mek niin, Spanish defender hi a lo kir hun tur chiang taka sawi awm lo mah se, a chawlh rei a ngaiin a rinawm bawk.

Madrid khaw club vanneihna chu international break a ni zui hlauh hi a ni a, player ṭhenkhat an dam hman a beiseiawm - November 24-ah league match khel turin an inlan leh dawn chauh a, tun atan chuan thlamuang takin an awm thei.