Milan leh Cagliari inehnehtawk

Rafael Leao chuan goal hnih khung mah se AC Milan chak nan a thawk zo lo a, an mikhualna ramah Cagliari nen 3-3 a inhnehtawkin point khat ve ve an insem.

Inrinni zan Sardegna Stadium-a inkhelah mualneitu Cagliari tan Nadir Zorte chuan minute hnihna lekah goal a khung a, chawlhlawk hmain Milan lamin Rafael Leao-a goal hnih hmangin an chhang let.

Mahse, second half-ah Cagliari duhlai Gabriele Zappa chuan goal hnih a khung ve tho a, striker Tammy Abraham-a'n goal khung ve tho mah se Milan chak nan a tawk zo ta bik lo.

AC Milan manager Paulo Fonseca chuan, "Team nghet tak ni tur chuan goal khung mai bakah a venhim lam kan thiam tel a ngai, tun ṭumah chuan kan tlarhnung a phui loh avangin point thum hmuh theih tura ngaih kha a thamral.

"Ka naute khelh dan ka sawisel lem lo, mahse hmasawn kan ngaihna lai chu chiang takin a lang niah ka ngai. Team inkhairual ṭha tak kan hmachhawn avangin thil kha a awlsam lo ve bawk a ni," tiin a sawi.

Inkhel dangah Juventus erawh an chak - Old Lady hian Timothy Weah leh Kenan Yildiz-a te goal hmangin an mikhual Torino chu 2-0 in an hneh a, harsa lutuk loin point thum an hlawh chhuak.

Juventus hian Serie A match 12 an khelh aṭangin point 23 an hmu a, pathumnaah an awm - champion lai Inter Milan nen an point a inzat. Mahse, pahnihna Inter leh hmahruaitu Napoli (25 points) te aiin Juve hian match khatin an khel tam zawk a ni.