ISL - chak awm loh zan
Zirtawpni leh Inrinni zan Indian Super League-ah inkhel pathum a awm a, chak an awm lo vek - match thumah hian an inhnehtawk vek! Nizan khan inkhel en châkawm takah Odisha chuan Mohun Bagan an mikhual a, he thu buatsaih a nih lai hian result kan hre hman lo.
Season duhawm tak hmangtu Bengaluru an vannei. NorthEast United lakah vawi hnih hnufual hman mah se, an si phurh an sut zel a, a tawpah 2-2 in an inhnehtawk. Highlander tan hian Alaaeddine Ajaraie chuan vawi hnih ngawt a team hi hma a hruaipui a, mahse, Bangalore club hian Alberto Noguera leh Ryan Williams hmangin si phurh an sut.
Highlander tana goal hnih khungtu Alaaeddine Ajaraie hian ISL-a a season hmasa ber a hmang ṭha hle. Tun season-ah match riat khelin goal 11 ngawt a khung tawh - Sree Kanteerava Stadium-a inkhelah hian Bengaluru tan Lalremtluanga Fanai chu bench aṭangin a lut.
Inrinni zanah ISL inkhel pahnih a awm a, Chennaiyin chuan an mikhual Mumbai City chu 1-1 in an lo inhnehtawkpui. Chennai club tan Ryan Edwards chuan minute 60-naah goal hmahruai a khung a, minute thum hnu lawkah Mumbai tan Nathan Rodrigues chuan si phurh hi sutin, goal dang a lut tawh lo.
Mualneitu Chennaiyin tan PC Laldinpuia leh Laldinliana Renthlei ten inkhel bul ṭanin, Lalrinliana Hnamte chu bench aṭangin a lut a, Mumbai tan Hmingthanmawia Ralte leh captain Lallianzuala Chhangte ten inkhel bul an ṭan - bench aṭangin hun pek belhah Daniel Lalhlimpuia chu luhtir a ni a, Serchhip forward tan tun season ISL-a a match hmasa ber a ni.
Inrinni zan inkhel dangah East Bengal leh Mohammedan SC te an inkhel a, goal awm loin an inhnehtawk. AFC Challenge League lama quarterfinal lut hlim EB player Nanda Kumar leh Mahesh Singh ten a zawnin red card hmu mah se, Mohammedan-in goal an khung thei chuang lo - player pahnih hnawhchhuah an nih hian minute 30 chauh an la khel.
East Bengal tan Lalchungnunga'n inkhel bul ṭanin, David Lalhlansanga chu hun pek belhah a lut ve hram a, Mohammedan tan Zodingliana Tochhawng, Vanlalzuidika Chhakchhuak leh Lalremsanga Fanai ten inkhel bul an ṭan a, bench aṭangin Lalrinfela Khiangte a lut bawk.