PSG an kal fal ta

Paris Saint Germain chuan Ligue 1 nomawi an kawl lai an hum leh ngei dawn niin a lang ta - Inrinni zan khan an mikhualna ramah Angers chu 4-2 in an hneh.

Paris club tan hian Lee Kang-in leh Bradley Barcola te chuan goal hnih ve ve an khung a, chawlhlawk hmain goal li an khung avangin chak zawk tur a chiang fel der tawh.

Hun tawp dawnah Angers hian Esteban Lepaul leh Emmanuel Biumla te hmangin an khung ve a, goal hnih an neih hi a tlai tawh em avangin mualneitu tan hian thawh chhuahna hun a awm tawh lo.

Inkhelh banah Luis Enrique chuan an hnehna chan chu Rafel Pol tan an hlan thu a sawi. Rafel Pol hi Enrique-a assistant a ni a, hun rei tak chhung damlo tawh a nupui Raquel-i chu tun hnai khan a thi a ni.

Enrique chuan, "Hringnunah hian hun harsa bik a thlen chang a awm ṭhin, tun hi Rafael Pol tan pawh chutiang hun chu a ni. Thihna hi chuan min khawih dan a danglam a, kan tawrhpui takzet a ni," tiin a sawi.

Ligue 1 champion lai PSG hian tun season league match 11 aṭangin point 29 an hmu thei a, anmahni hnaih bertu AS Monaco aiin khelh zat inangah point rukin an sang fal zawk.