Chak tura rin Arsenal, Spurs leh Leicester an chak

European football inelna sang pahnihna Europa League khelh ṭan a ni a, chak tura rin - Arsenal, Tottenham Hotspur, Leicester City leh AC Milan ten harsa lutuk loin hnehna an chang.

Ningani zan inkhel dangah chak tura rinkai zinga mi Napoli chu an mikhual AZ Alkmaar lakah 1-0 in an tlawm. Dutch club hi coronavirus vangin an buai a, an player 13 ngawt chhawr thei lo mah se Dani de Wit goal khat hmangin an chak.

Thomas Partey-a'n a vawi khat nan Arsenal tan inkhel bul a ṭan a, midfield lailum luahtu niin a ṭangkai hle. Gunners hian Austrian club Rapid Vienna chu 2-1 in an luhchhuah a, defender David Luiz leh captain Pierre-Emerick Aubameyang ten goal an khung.

Gunners manager Mikel Arteta chuan, "Inkhel chawhnu lamah khan chuan midfield kha a thunun hneh viau, a ṭul hunah chuan tlarhma lam pawh a pui ṭha hle," tiin Atletico Madrid aṭanga an player lakluh Partey chungchang a sawi.

Ghana international hian kar hmasa khan bench aṭanga lut chungin Manchester City a lo hmachhawn tawh bawk. Pathianni zana Leicester City an mikhual hunah pawh player pawimawh a ni chhunzawm ang.

Gunners inkhel hi Mesut Ozil chuan in aṭangin a lo en a, inkhelh ṭan hmain twitter lamah a ṭhiante a thlawp thu leh chak tura a rindan te a ziak a, khelmual chhungah awm ve thei lo mah se TV aṭanga a lo ṭan em em thu a ziak bawk.

Inkhelh banah Arteta chuan, "Inkhel ve lo ten khatianga an ṭhiante a lo thlawp kha thil ṭha tak a ni, midang pawhin ti se ve ka duh," tiin Ozil thil tih chu intih elna ni loin thinlung taka ṭhiante a thlawpna niin a sawi.

Harry Kane leh Son Heung-min te hahchawlhtir mah se Tottenham chuan Gareth Bale hoin inkhel bul an ṭan thei a, an mikhual Lask tan zuamawm loh tak an ni, Spurs hian Austrian club lakah 3-0 in hnehna an chang.

Tottenham Stadium a inkhelah Lucas Moura-a'n goal hmahruai a khung a, defender Andres Andrade chuan anmahni lamah a tih luh bakah, bench aṭanga rawn lut Son-a'n an goal thumna leh chak nemnghehna a khung bawk.

North London club tan hian loan hmang an hawh Carlos Vinicius chu tlarhma laiah a khel, Brazilian forward hian goal khung theihna hun nei mai se a vannei tawk lo a, Bale-a cross chu a khung dawn niin lang hman mah se Andrade (own goal) chuan an lamah a ti lut.

Spurs manager Jose Mourinho chuan, "Vinicius khan a match hmasa ber a khel a, a khel chhe lo. Goal a khung lo tih bak kha chu sawisel tur a awm hran lo, ball chan tumin a che reng a, striker Kane nen pawha khel dun thei tur a ni," tiin a sawi.

Mourinho naute hian West Ham lakah goal thum an hum zo lo a, tunah erawh an hum ta. Kar leh Thawhṭanni zan hian Premier League match khel turin Burnley an lenchilh zui leh nghal ang. Burnley hi season kal laia EPL match bika chak la nei lo pali zinga pakhat an ni.

Pathianni zana Arsenal hmachhawn tur Leicester City pawhin Europa League bul an ṭan fuh hle, Foxes tan hian England international James Maddison leh Harvey Barnes ten European football bika an goal hmasa ber an khung a, forward Kelechi Iheanacho-a'n goal khat a thawh bawk.

Chawn hliam vangin Jamie Vardy a la inlan thei lo, English striker hian Arsenal a hmachhawn thei dawn em tih pawh a la chiang lo. Leicester manager Brendan Rodgers chuan Vardy awm loh kara goal an khung bakah an tlarhnung phui chu an tan chanchin lawmawm a nih thu a sawi.

Inkhel dangah AC Milan chuan Celtic 3-1 in an luhchhuah, Italian club tan hian Rade Krunic, Brahim Diaz leh Jens Petter Hauge ten goal khat ṭheuh an khung. Scottish champion tana substitute Mohamed Elyounoussi khungin awmzia a nei lo.

Milan tan hian kum 39 mi Zlatan Ibrahimovic a inlan, Swede striker hian kum 19 liam ta khan Ajax tana khelin Celtic hi a lo hmachhawn tawh, a kum rualpui leh ani aia naupang tam zawk an chawlh hnuah pawh goal khung lo mah se ṭha takin a la khel thei.

Serie A season kal laia la chak vek Milan hian Thawhṭanni zanah league match khel turin AS Roma an mikhual zui leh ang. Roma hian Europa League lamah Young Boys chu 2-1 in an lo hneh ve bawk a, league-ah erawh pariatna dinhmun an luah.