Revierderby : Dortmund Vs Schalke

Bundesliga a nih tawh chuan Bayern Munich leh Borussia Dortmund inkhel hi boruak sang bera ngaitu an tam khawp ang. Amaherawhchu German ho chuan Dortmund leh Schalke inkhel hi derby zawng zawng chungah an dah a, Revierderby hming an vuah.

Zanin dar 10:00 hian Revierderby hi khelh a ni dawn. Dortmund leh Schalke te hi Ruhr chhunga mi an ni a, lungalhthei leh kahpathir (steel) hmunpui a ni. Heilai hmuna chengte hian football an tui chilh a, Dortmund leh Schalke awmna Gelsenkirchen hi 32 km lek a nih avangin an inhal hi a mak lo.

Revierderby a nih tawh chuan tui lai rapa awm a thiang lo a, i eng (yellow) loh chuan i pawl (royal blue) a ngai. Bundesliga awm hma chuan Schalke hi Ruhr chhungah an chungnung a, 1924/25 season khan an intawn hmasak ber ṭumah 4-2 in an chak.

Derby boruak pawh a ṭang ṭhin a, September 1969-a an inkhelh ṭum phei chu tun thlengin sawi zui a la hlawh. Dortmund stadium hlui Rote Erde Stadium-ah an inkhel a, Hans Pirkner-a'n first half-ah goal khungin khelmualah mipui an lut. Police-in mipui ṭhelh nan ui (alsatian) an chhuah a, Rex tih hming an vuah ui chuan Schalke defender Friedel Rausch chu a hnung lamah a seh a, a teammate  Gerd Neuser pawh a malpuiah a seh bawk.

Club pahnih hi inhal viau mah se an inzah tawn a, a ṭul a nih chuan an inpui hreh lo. Vawi tam tak an inpui tawn tawh. Kum 1974 khan Borussia Dortmund an relegate a, sum lamah an tla chhe bawk. 1974 FIFA World Cup hmain Dortmund khelmual Signal Iduna Park an peihfel hman a, Schalke hian an elpui sum harsatna hi hriatpuiin stadium hawnnaah an inkhelhpui a, ticket aṭanga sum hmuh chu Dortmund an chantir vek. Schalke pawhin kum 2001 khan tuna an stadium hman mek Veltins Arena an hawng a, Dortmund hi an sawm ve thung.

Tun hnuah erawh Dortmund an lian tawh zawk a, tun season-ah phei chuan Lucien Favre hote hian player beiseiawm rual an kawl avangin Bundesliga nomawi chawi thei tur hiala ngaih an ni. Manuel Neuer leh Leroy Sane te larchhuahna Schalke erawhin player langsar an kawl lo a, tun season-ah phei chuan chak an la nei lo - match hmasa pathumah an chak lo a, match hnuhnung berah Union Berlin nen an inhnehtawk.

Result ṭhat loh avangin manager David Wagner an ban tawh a, Manuel Baum lalutin relegate loh chu an thupui ber tur niin a lang.