Indian Super League a hnai ta

India mai ni lo, Asian football-ah pawh thawm nei hat khawpa boruak lian chho mek Indian Super League khelh hun a hnai zel a, inelna hi November 20-ah khelh ṭan a ni dawn. 

Covid-19 vangin season dang ang erawh a ni dawn lo a, home & away-a khelh ṭhin inelna hi Goa-in a thleng dawn - team tel tur 11 chuan Goa hi an thleng tawh. 

ISL season sarihnaah hian en tu pawh an awm thei dawn lo a, player-te pawh midang tlawh pawh theih loh tura fimkhur thei ang bera an awm theih nan dan leh hrai uluk taka duan a ni bawk. 

Tun season ISL-ah team 11 an tel tawh dawn a, Indian football-a hming dai tawh ngai lo tur East Bengal leh Mohun Bagan chuan a vawi khat nan Indian Super League an khel dawn. 

East Bengal hi Shree Cement nen an thawh ho avanga ISL khel thei tur an ni a, I League club hlun ni ṭhin hian sum an ngah tak avangin coach atan pawh Liverpool legend Robbie Fowler an ruat. 

Mohun Bagan erawh ISL team awm sa ATK nena inzawm an nih avangin ISL club an tih pun phah lo a, mahse ATK zawk hian an colour leh logo hnuchhawna Mariners duh dan an kalpui avangin fans an ngah sawt ang. 

Tarlan tawh angin inelna hi Goa-in a thleng dawn a, stadium pathumah inelna hi kalpui tur a ni. Jawaharlal Nehru Stadium (Fatorda), Tilak Nagar Stadium (Vasco da Gama) leh GMC Athletic Stadium (Bambolim)-te chuan inelna hi an thleng dawn.

ISL club-ten training an neihna turin khelmual 12 thlanchhuah a ni bawk a, team 11 inel tur an nih avangin duhthusam ang zana training theihna turin club tinin training ground an nei thei dawn tihna a ni. 

Home & away-a khelh theih loh hi club tan chuan channa langsar tak angin lang mah se player-ten zin kual a ngaih loh avangin hahdam zawkin inelna an hmachhawn thei dawn tihna a ni a, a êng zawnga thlir chuan hmun khata inelna hmachhawn hi a ṭha hle. 

Season dangah chuan inelna hmachhawn hmaa inbuatsaih nan ISL club-ten rampawnah tour neiin an zin kual ṭhin a, an theihna enfiah nan ram pawn team nen friendly match an khel ṭhin. 

Tun season-ah erawh Covid-19 vangin ram pawnah pre-season neih theih a ni lo a, hei vang hian ISL club 10 zet chuan Goa thleng tawhin inelna hmachhawnna tur hmunah pre-season an hmang. 

Indian club changtlung ber pawl Bengaluru erawh Vijayanagar, Bangalore lama an hmunah inkulhin training an kalpui mek a, anni pawh Goa thleng thuai tura beisei an ni.  

Hri leng karah inelna kalpui a nih dawn avangin fimkhur a ngai a, ISL chuan medical team hranpa neiin League Hygiene Officer an nei dawn bawk a, club tin chu Hygiene Officer nei tura tih an ni bawk. 

Players, team officials leh an chenpui, anmahni hnaihtu an chhungkua leh ṭhiante bakah backroom staff leh television presenter-te chu high protection group-ah dah an ni a, anni hi kartin vawi hnih aṭanga vawi thum Covid-19 test neihsak an ni ang. 

League staff, broadcast staff, club management officials leh hotel staff-te chu 'medium protection group'-ah dah niin kar khatah vawi khat emaw vawi hnih test neih ṭhin tur a ni a, accredited agency staff-te chu general protection group-ah awmin kar khatah vawi khat test an nei ṭhin dawn thung.