Spanish Football buaina a tawp Barcelona an champion thei dawn em?

Spanish Football Federation (RFEF) in May 16 aṭanga ṭan turin Spanish Football zawng zawng tihtawp tum mah se court-in RFEF chet dan chu dan kalh a ni a tih avangin Spanish football tih­tawpna pawh hlih leh nghal a ni.

Tunhnaiah Spain sorkar in TV rights chungchanga dan thar a siam an duh loh vangin Spanish Football Federation chuan Spain ram chhunga football kaihhnawih thil zawng zawng chu May 16 aṭanga ṭanin titawp turin thu an chhuah a, professional football player intelkhawm pawl AFE chuan a thlawp bawk. Mahse, court-in an nawrhna titawp tura thu a pek takah chuan fixture pangngai angin Spain football a kal chhunzawm dawn a ni.

Barca tan vawikhat chak a tawk

Pathianni zan dar 10:30-ah champion lai Atletico Madrid-in hmahruai mektu Barcelona an mikhual dawn a, Barca hi an chak anih chuan match khelh tur pakhat la nei chungin La Liga champion an ni thei dawn. Barcelona hi tun season-ah an che ṭha hle a, 'treble' champion ni thei turin dinhmun duhawm takah an ding mek. Spanish Cup Copa del Rey-ah final an lut tawh a, Champions League-ah final an lut bawk. Heng inelna pathumah te hian an champion thei vek a nih ngat chuan Barcelona-a a season khatna hmang mek manager Luis Enrique tan chuan record chhuanawm tak a ni ngei ang.

Atletico Madrid tan Barca tlar hma pathum Lionel Messi, Luis Suarez leh Neymar te dan tum hi hna hautak tak a ni dawn. Atletico tana chanchin ṭha chu malpui hliam vangin Luis Suarez inkhelh theih dawn leh dawn loh hriat a la ni lo. Liverpool striker hlui hian a hliam vang hian Ningani aṭang khan club training pawh a zawm thei lo a ni.

Barca tlarhnung tan tun season La Liga-a goal 22 khung tawhtu Atletico striker Antoine Griezman hi ngaihthah ngawt chi a ni bik hauh lo bawk ang.

Inkhel chhehvel

Atletico Madrid hian Barce­lona hi an ngam lo hle, an pahnih intawn hnuhnung vawi kua-ah Madrid khaw club hian chak hmel an la hmu ve lo. Vawi sarih Barcelona chakin vawi khat an inhnehtawk a ni. Atletico Madrid fapa chuam Fernando Torres hian La Liga team zingah goal kua lai a khungna Villarreal tih lohah chuan Barcelona a ngam ber a, Catalan team lakah hian goal sarih lai a khung tawh. Mahse Barca thiampuipa Messi hi Atletico Madrid ngam em em tu ve tho a ni. La Liga team zingah Atletico Madrid leh Sevilla lakah goal a khung hnem ber a, goal 22 ve ve team pahnih goal-ah hian a khung tawh a ni.

Barcelona hi La Liga match hnuhnung pangaah chak vekin goal 20 zet an khung a, goal khatmah an chhuah lo thung. An tlar hma in goal khung an awlsam tluk zetin an tlar hnung pawh an khawng ṭha.