MotoGP A vawi 53 nan France Grand Prix

Kum 1949 a MotoGP World Championship tlan ṭan a nih aṭang khan French Grand Prix hi vawi 52 an tlan tawh a, 8895-meter Albi tlankawngah kum 1953 khan a vawikhat nan French Grand Prix hi an tlan a ni. Pathianni hian a vawi 53 nan intlansiak hmuhnawm tak en tur a awm leh ang.

Kar hnih liamta khan Jerez-ah Spanish Grand Prix hmuhnawm tak kan hmuh vangin tunkar intlansiak tur pawh hian ngaihven a hlawh nasat phah hle. Kumin intlansiak vawi li awm tawh aṭangin Valentino Rossi, Marc Marquez leh Jorge Lorenzo ten hnehna an chang tawh a, anni pathum bawk hi France-ah pawh mipui mit fukna tur an ni leh ang.

Intlansiak hnuhnung bera pakhatna Lorenzo hian Europe a intlansiak nuam a tih thu leh a chetṭhatna ṭhin hmun a nih thu a lo sawi tawh. A sawi ang ngeiin Europe a intlansiakna hmasa berah hnehna a chang, tunkarah pawh hian beiseina a nei sangin hnehna chan leh ngei a tum ang. Amaherawhchu amah ang tho a bike nei ṭha leh tawnhriat ngah Rossi hian pakhatna nih nawn tir a tum hauh lo ang. Yamaha rider pahnihte inum hi khawvel hmuh chak a ni.

Le Mans-ah hian Honda team an chet ṭhat ṭhin avangin tun ṭumah pawh hian Honda rider Marc Marque hi ngaihthah theih a ni lo ang. Kum 2002 a four-stroke MotoGP hman anih aṭang khan he tlankawngah hian Honda team hian vawi sarih hnehna an chang tawh a, Yamaha-in vawi nga hnehna an chang tawh bawk.

France a hnehna chang tam berte chu Jorge Lorenzo leh Dani Pedrosa an ni a, anni pahnih hian vawi li ve ve hnehna an chang tawh.