Hamilton leh Mercedes tan hun ṭha

Pathianni zan dar 6:40 hian Formula 1 Portuguese Grand Prix tlan a ni dawn a, driver championship hmahruaitu Lewis Hamilton tan sulhnu ropui hnutchhiah theihna hun a ni, a team Mercedes tan world title nemngheh theihna hun a ni bawk.

Britain tlangval Hamilton hian F1 huangah vawi 91 ngawt hnehna a chang tawh, record nei ṭha ber Michael Schumacher nen an intluk mek - Hamilton hian hnehna a chang leh a nih chuan car intlansiakna sang bera mimal chak hnem ber a ni ang.

Mercedes tan pawh hun ṭha a nei thei, team championship lama anmahni hnaih bertu Red Bull aiin point 40 a an hmu tam a nih chuan an title kawl lai an humhim der dawn, chutihrualin hemi thleng tur chuan Red Bull an chet sual viau a ngai thung dawn a ni.

Mercedes team boss Toto Wolff chuan, "Khawl lamah harsatna tenau kan nei, tunah erawh kan chingfel tawh," tiin inelna hmachhawn tura an inpeih thu a sawi. Portugal hian kum 24 hnua a vawi khat nan F1 a thleng leh dawn.

Kuminah hian mimal inelna lamah Hamilton elphak an awm meuh lo, a teammate Valtteri Bottas nen an inkarah point 55 zet a awm. Hamilton hian a nomawi kawl lai a humhim leh ngei a rinawm a, champion hnem lamah pawh German legend Schumacher (7 titles) a tluk chiah ang.