Anfield-ah Gerrard a hun hnuhnung

Zanin dar 10:00 hian Liver­pool-in an khelmual Anfield-ah Crystal Palace an mikhual dawn a, an captain ropui, season thara LA Galaxy pan tur Steven Gerrard-a tan Anfield-a a game hnuhnung ber tur a ni dawn a, Liverpool fan tam tak lung a leng lawk.

Inkhelh hmain Liverpool leh Crystal Palace player te'n kut beng chungin Reds player ropui hi an lawm anga, big screen-ah Liverpool tana hna ropui tak a lo thawh tawhte chhuah a ni bawk ang.

Ka theihtawkah ka lawm - Gerrard

Liverpool tan season tam zawk khelh theih ala inbeisei avangin captain nichungin ram tan inkhelh a chawlhsan a, mahse Stevie G hi a beisei angin Liverpool-in 'mamawh tawh lo' niin an lo inhre si. Regular player a nih phak tawh loh tur thu hrilh a nih hnuah a hmangaih Liverpool a hnuchhawn a, hmun a chan tam theihna tur nia a ngaih USA lam a pan dawn ta.

Liverpool-a kum 17 a cham chhunga match 700 chuang khel thei Gerrard chuan, "Liverpool ka khelh chhunga pawi ka tih ber chu Premier League ka chawi miah lo hi a ni. Lawmman dawn theih ang zawng zawng ka dawn vek thu sawi hi ka chak a, ka tan chuan inchhuanna tham a ni dawn a ni," a ti.

Kum 1998 a Liverpool tana a senior game hmasa ber kheltu chuan, "Kan duhthusam zawng zawng hi a thleng dik vek thei lo. Premier League chawi lo mah ila trophy lian tham tak tak ka chawi tho a, hlim chang leh lungngaih chang hi chu a in chhawk ve reng bawk a ni," tiin duhthusam anga thil a kal vek theih loh thu a sawi.

Captain Fantastic chuan, "Tu zin­kawng mah hi an duh angin a kal vek bik lo. Ka zinkawng pawh chutiang bawk chu a ni. FA Cup final-a kan chak lohna te leh 2007 Champions League final kan khelh te kha ka thlir let a, ka ui hle. Mahse, Liverpool tana ka thiltihah te khan ka lawm a, engmah in ka thleng phal lo ang," tiin Liverpool tana a thiltih te chuan a tih lawm thu a sawi.

Mi lungleng Gerrard

2005 Champions League-a ropui taka Liverpool champion puitu Gerrard chuan, "Anfield-a ka game hnuhnung ber ka khel dawn a, ka lung a leng lawk hle. A lungchhiatthlak dawn tih hi zep rual a ni lo a, hetiang dinhmunah hian ka la din ngai loh avangin engtia hmachhawn tur nge tih pawh ka hrethiam lo. Min ṭantu leh ngainatu te hnenah 'mangṭha' tih a ngai ta mai hi a lunglenthlak dawn khawp mai. Ka theihtawpin mahni inthunun ka tum anga, insum hram hram ka tum ang," tiin ṭah loh hram a tum tur thu a sawi.

Liverpool defender ropui chawl ta Jamie Carragher chuan Sami Hyypia anga ṭap lo turin Gerrard hi a lo hrilh lawk tawh!

Gerrard chuan, "Kum rei tak chhung minlo ṭan tawhtu te hnena lawmthu sawi hi ka duh ber chu a ni," a ti.

Team aia pawimawh zawk an awm lo - Gerrard

Liverpool-a a khelhpui ṭhin Jamie Redknapp-a'n 'Superman' tia a koh Gerrard chuan Crystal Palace nen an inkhelh huna mipui mit fukna ber a ni tur chu a inthiam loh thu a sawi.

Thla 18 cham tura USA pan tur Gerrard chuan, "Crystal Palace nen kan inkhelh hunah chak ngei ka duh a, chu chu ka tana pawimawh ber chu a ni. Anfield-a ka game hnuhnung ber tur anih dawn avangin ka chungah mit a fu ṭhup dawn tih ka hria a, ka team-mate te lakah ka inthiam lo hle. Hamrik ham a nih ruala pawimawh ber tur chu kei nilovin kan inkhel a ni a, point thum hlawhchhuah hi a pawimawh zawk chu a ni. Kan inkhelh laia player te rilru ka la peng palh a nih chuan ngaihdam ka dil lawk a ni. Mahni aia team dah pawimawh hmasa ṭhin zawk ka ni a, chu chu Liverpool tana ka khelh ni aṭanga ka dinna a ni," a ti.

Liverpool a kir leh tur Gerrard

FA Cup vawi hnih leh League Cup vawi thum chawi tawhtu Gerrard chuan Liverpool-ah kir leh ngei a tum thu a sawi.

Kum 34-a upa midfielder chuan, "Club chairman Tom Werner nen kan inbia a, Brendan Rodgers nen pawh kan ti ti tawh. Chiang taka thutlukna siam erawh kan la nei lo. Liverpool a lo kir leh ngei hi ka duh a, he team ropui tak hi enkawl ka chak a ni," tiin coaching lamin a rilru a luah thu a sawi.

England captain hlui chuan season thara top four kai tur chuan striker goal khung thei an mamawh thu sawiin, "Nikumah Luis Suarez leh Daniel Sturridge te kan nei a, kan thlen chin in hria. Tuna kan mamawh ber chu season khata goal 25-30 inkar khung thei hi a ni. Sturridge inhliam vangin tun season-ah chutiang striker chu kan nei lo a, world class striker kan mamawh a ni," a ti.

Gerrard leh Liverpool

Liverpool manager Brendan Rodgers chuan, "Liverpool staff te hnen­ah thumal pakhat hmanga 'Gerrard' hrilh­fiah turin ka hrilh a, 'Liverpool' tih vekin an sawi. Amah pumpui hi Liverpool a ni tawp mai a, Liverpool tana a tih tawh zozai hi sawi sen rual a ni lo. Liverpool Football club tan ringawt ni lo, Liverpool khawpui leh mipui tan pawh Gerrard hian hna a thawk hnem em em a, Politician tam takin he khawpui tana Gerrard-a hnathawh ang zat hi zat ang hi an thawk lo. He khaw mipui leh club tan ani hi chu mi bik a ni,"a ti.