Europa League Thirletna Champion lai Sevilla-in final an lut
Ningani zan khan Europa champion lai Sevilla chuan Fiorentina 2-0 a hnehin final an lut leh ta, first leg-ah 3-0 a an hneh tawh bawk avangin inkhel pahnih belh khawmah Sevilla hi 5-0 in an chak a ni.
Semi final inkhel dangah Ukrainian club Dnipro Dnipropetrovsk chuan an khelmualah Napoli 1-0 a hnehin an club chanchina a vawikhat nan final an lut ve bawk. Sevilla leh Dnipro te hian May 27 khian Warsaw-ah final an khel ang.
Fiorentina ngam loh Sevilla
Fiorentina hian khualmualah Sevilla hi 3-0 in an hneh lo tawh a, Ningani zan khan an khelmual Stadio Artemio Franchi-ah an lo mikhual ve thung. Besei nei tam tawh lo mah se beisei bo chu an la ni bik lo. Mahse, Fiorentina beiseina neih chhun hi first hlaf a Sevilla striker Carlos Bacca goal thun leh defender Daniel Carrico te goal khat ve ve thun hmangin minute 45 a ral hmain a tawp nghal. Fiorentina in chance an neih ṭhat ber second half-a an penalty hmuh chu Josip Ilicic-a'n a pet goal lo.
Sevilla manager Unai Emery chuan, "Kan chakna hi kan fan te tan kan hlan e. Europa inelna hi club dangte ai mahin kan club hian kan ngainain kan ngaipawimawh bik hle. Fiorentina kha team ṭha tak an nih avangin kan chak theina chance kha 50% chauh a ni a, goal kan khung hma thei khan inkhelh a tih awlsam phah hlauh a ni. Tun hi hlim hun a ni a, thlamuang takin final kan khelh hun tur kan thlir thei tawh ang," tiin a sawi.
Tun dinhmunah Sevilla hi La Liga table-ah pangana an ni mek a, kum thara Champions League playoff khel turin Valencia chu point thumin an pha lo mek. League match hnih khelh hmabak an la neih aṭang hian an dinhmun tur ala chiang chauh ang. Spanish La Liga-ah palina an ni phalo a nih pawhin Europa League final-ah Dnipro an hneh a nih chuan direct-in Champions League group stage an kai dawn a ni.
Rafael Benitez beiseina a thamral
Spanish manager Rafael Benitez hian Valencia leh Chelsea a enkawl laiin Europa champion nomawi a lo chawi tawh a, khawvel manager dang ten an la tih theih loh Europa League a vawithum champion theihna hun ṭha a nei a, mahse a beiseina neih chu Dnipro striker striker Yevhen Seleznyov-a'n a tih tawp sak.
An club din tirh aṭangin Ukrainian club Dnipro hian Europa League final an la lut ngai lo a, tun ṭum hi an vawikhat luhna chiah a ni. Final lut tur hian first leg-ah an khingpui Napoli chu sikhat ve ve pein an inhnehtawk pui tawh a, inkhel vawihnihna-ah erawh minute 58-a Seleznyov-a goal khung hmangin an mikhual Napoli 1-0 in an loh hneh. Inkhel pahnih belh khawmin Dnipro hi 2-1 in an chak.
Eng nge an sawi?
Napoli manager Benitez chuan, "Goal khung tumin Dnipro goal lamah vawi 19 zet kan pet a, mahse goal kan khung thei chuang si lo. First leg-ah pawh khatiang deuh khan thil a thleng tawh bawk, kan tan final luh hi a rem lo a ni e. Chak turin kan theih tawp kan chhuah a, kan thihna zawng zawng kan hlan. Kan duh ang result kan hlawhchhuak zo lo hi a pawi ka ti tak zet zet.
Gonzalo Higuain te tlar hmaah an awm a nih chuan goal khung ngei tura beisei kan ni chiang a, mahse a mak a ni. Kan vanduai ṭum a ni e," tiin an chak loh chu an vanduai vang a nih thu a sawi.
Dnipro manager Myron Markevych chuan, "Kan club mi leh sa zawng zawngte hian eng nge football kan khelh chhan hi an chiang hle. He club hi a danglam em em a, fans ṭha leh rinawm tak kan neih bakah Dnipropetrovsk khaw mipuite hian football hi an ngainain an hmangaih. Kan inpumkhatna a ṭhain kan theih tawp ṭheuh kan chhuaha, a rah kan seng a ni," tiin a sawi.