Chelsea-in Cech club dang biak an phal sak
Goalkeeper Petr Cech chuan kum 11 chhung Chelsea tana a khelh hnuah a chhuahsan lam a hnaih ta. A agent Viktor Kolar chuan Czech Republic keeper hi club dang biak an phal sak thu a sawi.
Kolar chuan, "Petr hian a contract-ah kum khat chu a la nei a, amaherawhchu Chelsea-in club dang biak an remti tawh. Petr hian first keeper nih a duh a, amaherawhchu club dang zawm tur chuan tihfel tur a la ngai tam hle. July 1-ah transfer hun a in hawng dawn chauh," tiin a sawi.
Kum 32-a upa Cech hian kum 2004 khan London club hi a zawm a, Belgian keeper Thibaut Courtois a tluk loh avangin tun season-ah match 16 chiah a khel. Cech hian season khat second keeper-a awm pawi a ti lo a, season hnih erawh a zuam lo.
Chelsea manager Jose Mourinho chuan, "Tun season-ah Petr hi awm lo se chuan kan champion lo ang. Premier League inkhel pawimawh tak parukah a veng a, kha match-a kan point hlawhchhuah tel lo kha chuan champion thei kan ni lo," tiin a sawi.
Portuguese manager chuan, "Kan duh dan chuan Petr hi kan bulah awm se tih hi a ni a, a chhuak dawn a nih chuan England club-ah khel lo se ka ti," a ti.
Mourinho chuan tawnhriat nei ṭha keeper hi cham turin duh mah se Stamford Bridge-ah a awm zel a rinawm tawh loh. Cech hian Chelsea hi Premier League title leh FA Cup pali ve ve a lak pui a, League Cup pathum a chawi bui bakah Champions League leh Europa League-ah vawi khat ve ve a champion pui bawk.