Relegation Battle Hull City an ṭang tluan thei ang em?
Premier League aṭanga tla tur pahnih a chiang tawh. Queens Park Rangers leh Burnley an tla tawh a; club dang pakhat an la tla dawn a, chhiarkawp dana him lo chu Aston Villa, Leicester City, Sunderland, Newcastle United leh Hull City an ni.
Hull City-in zanin dar 7:30 hian White Hart Lane-ah Tottenham Hotspurs an hmachhawn dawn a, an chak loh chuan 14-naa awm Aston Villa-in point an hlawhchhuak lo a nih pawhin season tharah Premier League an khel thei tawh ang.
Hull hian Spurs an hmachhawn hnuhnung pariatah chak an nei lo a, 2009-10 season kha an hneh hnuhnun ber a ni. An inhmachhawn hnuhnun ber khan Jake Livermore-a goal hmangin Hull City-in hma hruai mah se Tottenham-in Christian Eriksen leh Harry Kane te hmangin an lehthal. Hull-in Premier League khel zel turin point thum an mamawh a, season thara Europa League khel turin Spurs-in point thum an mamawh ve bawk.
Newcastle hian point hmuh belh miah loin Premier League an khel chhunzawm thei a, amaherawhchu tla tawh QPR laka point thum an hlawhchhuah loh chuan season tharah John Carver-a'n manager hna a chelh chhunzawm tawh lo ang. Kar liamta khan Newcastle hian West Brom an draw a, hemi hma hian a zawnin match riat an chak lo.
Tla thei dihmuna ding Sunderland leh Leicester City inkhel tur hi a ngaihnawm ang. A chak zawkin hahdam takin season tawp an khar thei ang. Sunderland hi an chak zo lo a nih chuan Arsenal leh Chelsea an la hmachhawn dawn avangin an dinhmun hi awhawm hran lo.
Aston Villa-in Southampton an hmachhawn dawn. Villa hian February thlaa Hull an hneh loh khan relegation zone-ah an awm hman a, Tim Sherwood hnuaiah harhna thar an chang a, player pawimawh Christian Benteke leh Tom Cleverley te an che ṭha bawk. Chutihrualin season bul ṭan ṭha Southampton-in season thara Europa League khelh an tum avangin Villa tan point hlawhchhuah hrim hrim a har khawp ang.
Zanin Inkhel Tur
Southampton 5:15 PM Aston Villa
Burnley 7:30 PM Stoke City
QPR 7:30 PM Newcastle United
Sunderland 7:30 PM Leicester City
Tottenham 7:30 PM Hull City
West Ham 7:30 PM Everton
Liverpool 10:00 PM Crystal Palace