Pathianni zanah Manchester United Vs Arsenal
Old Trafford-ah Manchester United-in tun season-a an match hnuhnung ber an khel dawn a, an khingpui tur chu FA Cup aṭanga petchhuaktu Arsenal an ni. Premier League-ah Chelsea an champion tawh nachungin Pathianni zan dar 8:30-a club inhal tak inhmachhawn tur hian ngaihven a hlawh hle.
Louis van Gaal-a hote hian Champions League khel pha chiang turin point khat an la mamawh a, Arsenal chunga an awm theih chuan UCL Playoff an pumpelh thei ang. Point 68 hmu tawh Manchester United-in London club hi point hnih chiahin an pha lo a, amaherawhchu Arsene Wenger-a hote hian match khatin an khel tlem zawk. United-in season khar nan Hull City an la khelh pui dawn a, Arsenal-in Sunderland leh West Brom te an la hmachhawn ang.
Kum hnih nil
Sir Alex Ferguson-a chhuah hnuah David Moyes-a'n Manchester United a enkawl a, Community Shield chawi nghal mah se nomawi dangin a chhunzawm lo. Dutch manager Louis van Gaal-a'n kum khatnaah nomawi a chawi lo a, kum hnih chhung United-in inelna lian thamah an chawmpion tawh lo.
Tun season-a United trophy lak theihna daltu chu Arsenal an ni. March 9 khan Arsenal-in Old Trafford an luh chhuah a, chakna goal khungtu chu United aṭanga an lak luh Danny Welbeck a ni.
Arsenal hian 2005-a FA Cup an champion hnuah an nomawi chawi loin an awm vang vang a, nikum khan FA Cup an champion leh chiah a, kuminah final an lut leh bawk. Manchester United hmabak a eng vak bik lo.
Team Dinhmun
United-in match thum a zawna an chak loh hnuah Crystal Palace an hneh a, khami ṭuma inhliam Luke Shaw leh Wayne Rooney te chu Dutch manager Van Gaal-a'n Arsenal an hmachhawn theih tur thu a sawi. Angel di Maria emaw Robin van Persie emaw starting eleven-ah an kir hmel a, Michael Carrick leh Rafael te erawh seasaon tluanin an khel thei dawn lo.
Arsenal-in Alex Oxlade-Chamberlain, Mathieu Debuchy leh Mikel Arteta te an chhawr thei dawn lo a; Danny Welbeck a la dam hman lo bawk. Nimin thleng khan Aaron Ramsey-a'n training a la zawm lo bawk.
Old Trafford-ah United
Premier League-ah United-in vawi 22 Arsenal an mikhual tawh a, vawi 14 an chak a, vawi nga an inhnehtawk a, Arsenal hi vawi thum chiah an la chak. League bikah chuan United hi vawi nga an chak zawn tawh a, amaherawhchu Old Trafford hi tun season-a Arsenal-in United an hnawhchhuahna hmun a ni.
Manchester United hian Premier League ṭan hnua Old Trafford-a an match hnuhnung berah vawi 15 an chak a, vawi li an in draw a, vawi thum an chak lo. Kum 2009 kha Old Trafford-a an match hnuhnung bera an chak loh hnuhnun ber a ni a, an hneh loh chu Arsenal an ni.
Midfield thunun
Arsenal-in Thawhṭanni zanah rin loh takin Swansea an hneh lo. German defender Per Mertesacker chuan, "Old Trafford-ah kan chak tawh a, season khatah vawi hnih kan chak thei a ni," tiin a zawna chak loh an tum loh thu a sawi.
Midfield thunun a pawimawh thu sawiin Mertesacker chuan, "Marouane Fellaini an nei a, kan intawn hnuhnun ber khan Francis Coquelin a che ṭha em em a. Helai hmun hi team pahnih danglamna tur a ni. Tun season-ah match li hmabak kan la nei a, team boruak a ṭha a, season ṭha takin kan khar thei a ni," a ti.
Arsenal manager Arsene Wenger chuan, "Swansea kan hneh loh hnuah chak ngei kan duh a. Chak emaw draw result emaw kan hlawhchhuah chuan United lak aṭangin kan fal ang a, pathumna nih a har tawh lo ang. FA Cup-ah kan hneh tawh a, tuna kan hneh leh chuan rilru takin kan chungnung thei tawh ang," tiin a sawi.
United defender Phil Jones chuan, "Match pawimawh tak a ni a, chak kan duh. Season tawpah a sang thei bera awm kan duh a, chuvangin kan match hmabak hi chu chak ve ve a ngai a ni," tiin a sawi.
Swansea Vs Man City
Manchester City-in Champions League playoff pumpelh turin Swansea City leh Southampton lak aṭangin point khat chiah hlawhchhuah a ngai tawh. Pathianni zan dar 6:00-ah Arsenal hnehtu Swansea nen Liberty Stadium-ah an inkhel ang.
November thlaa an intawn hmasak zawk ṭumin City 2-1 in an chak a, Swansea goal awmchhun khungtu Wilfried Bony-a'n City kawr a ha tawh ang. Swansea hian match thum a zawnin City hi an hneh tawh lo.
City forward Sergio Aguero-a'n goal 25 a khung tawh a, Harry Kane (20 Goals) leh Diego Costa (19) tan um phak theih a rinawm tawh lo. Argentine forward hi Swansea tlar hnung tan ven uluk a ṭul ang.
Premier League Fixtures
Pathianni Zan
Swansea City 6:00 PM Manchester City
Manchester Utd 8:30 PM Arsenal
Thawhṭanni Zan
West Brom 12:30 AM Chelsea
Team Dinhmun
# Team Pld W D L GF GA GD Pts
1 Chelsea 36 25 9 2 70 28 42 84
2 Manchester City 36 22 7 7 77 36 41 73
3 Arsenal 35 21 7 7 66 34 32 70
4 Manchester United 36 20 8 8 61 36 25 68
5 Liverpool 36 18 8 10 50 39 11 62